一個從未聽過嘅地方,一個從未聽過嘅馬拉松。我印象中,松江係中國嘅一個地方,點不知原來係日本山陰地區嘅一個城市。座落於島根縣的中間,比較廣為人熟識的鳥取縣米子市附近。香港直航飛機得近期好 Hit 嘅香港航空,相比飛去大阪,少大約30分鐘機程。

原來,國寶城松江馬拉松今年先係黎到第二屆,對比有名氣的「阪馬」、「東馬」等大型賽事,松江馬更突顯出風土情嘅一面。無大型嘅 Expo、無嚴格嘅選手報到手帶、無嚴格規管嘅「上線閘口」,但全部參加者都好安守本份,無你爭我奪地「站在起跑線上」。可能大家都本住黎玩嘅心態,無刻意為左做成績而拼搏,都係日本鄉郊馬其中一個令人鍾情嘅地方,你可以完完全全享受馬拉松當中嘅樂趣。

比賽當日氣溫大約7度左右,跑完嘅時候大約12度,路線主要圍繞住松江市及境港市中間嘅一個湖,上落路段唔算多,主要上斜得兩段,大約係12&34km位置,以暗斜為主,辛苦程度對於跑開昂船洲大橋嘅香港人黎講實屬「九牛一毛」。賽事總參加人數約為5000人,而賽會於起終點3km位置內都封閉曬6條行車線,所以都無出現塞車情況。

「松江馬」有好多細心位不得不讚,佢起點位於市內中心位置,旁邊有個大型體育館,所有更衣、行李寄存都係體育館內。仲記得舊年金澤馬天氣都係大約8-10度,但係所有更衣、行李寄存都係室外地方,真係凍到崩潰。相反,今次參加松江馬嘅所有準備都可以係室內進行,無論熱身、寄行李、衝線後休息,都係體育館內,係12月呢個寒冷季節,有個室內地方休息,是十分重要的。

0-10km

是次大會封閉左4-6條行車線,所以就算我企係F起跑區都無出現塞車情況。起跑左大約500m後就已經到達左地標 - 松江城,大批打氣團位於松江城下作 Cosplay 打氣,為起跑氣氛增加不少色彩。之後圍繞住市內跑大約6-7km左右就向著境港市進發。

10-20km

雖然呢場比賽參加人數唔多,但身邊總會有幾個人跑極都係差唔多步速。所以一於組成一個迷你集團一齊跑。天氣得10度以下,跑極都會有冷風迎臉而黎,所以集團式跑手可以輪流帶頭,互相擋風。去到12-13km位置,慢慢步入鄉郊,第一下有種感覺係進入左京都嵐山竹林感覺,比周邊環境吸引住,但同時一念天堂,一念地獄。眼前即將步入大約1km嘅暗上斜 (攀升約25m ; 平均100m/2.5米攀升),好彩嘅係,上斜斜度並唔高,集團式跑手們嘅我地好快就上到頂,最開心嘅事就係上幾斜,之後就會落返幾多。

20-30km

去到21km位置,剛剛到達半程馬拉松距離,狀態無受頭先上斜嘅影響,反而越跑越順。同時亦步入環湖路線的一部份。大約有10km路段都係圍繞著中海跑,而且風景好開揚,好天嘅時間仲可以望到山陰地區嘅一線山脈,仲好清楚咁見到山陰地區最著名一座山 - 大山,遠睇好似富士山,同樣山頂位置都有積雪,不過山高只有大約1900m,如果下次黎山陰地區,我都想試下探索一下大山嘅自然一面。

30-40km

路程終於過左3分2,進入馬拉松最緊張嘅最後12km,亦都係馬拉松跑手視為最關鍵,PB與否都睇呢12km嘅「造化」。睇住隔離各個跑手已經進入左「作戰狀態」。而我,就繼續從容不迫,繼續佢有佢搏盡,我有我享受的心態。感受一下這個久未被旅遊業洗禮的鄉村風味。唯獨比賽路段去到34km左右位置,有一條長約1km的暗斜要開展,眼見好多「作戰狀態」嘅跑手都被呢條斜路打敗,足以證明34km呢個上斜位係今場比賽嘅「大佬」。

40-42.195km

快樂嘅時間,經過三十多公里嘅體驗,松江市區嘅街道出現在眼前。呢一刻,身體嘅血突然變得沸騰,可能係..因為知道即將要衝線,完成我嘅第八隻馬拉松,更可能嘅係,由寂靜地方,搖身一變,整條足足2公里的最尾路段,滿佈市民,力歇聲嘶地為每位跑手作「最後吶喊」。曾經,有一場馬拉松去到最後的2公里我近乎倒下,雙腿四頭肌已經緊到不行,在同樣的情境,因為大批市民的打氣,令我能夠堅持跑到返終點,成就左PB。返番黎松江城,慢慢一步又一步,轉多兩個彎再兩彎,眼前就見到數小前的起點。每一場馬拉松,呢一個時刻,都係最感人最感動。馬拉松,可以話係一件又愛又恨嘅事,沿途可以話係痛苦到不得了,但成功返到終點果種滿足感,更係無野取代得到。最重要嘅係,我終於可以去食好野飲啤酒!!

總結

國寶松江城馬拉松2019,去到今年第二屆舉辦。沒有最完善嘅配套,但有很強大的市民為你打氣。沒有金澤馬般吸引嘅咖喱飯,卻有大自然壯麗風景嘅一面讓你享受。香港人,當每日都係勞勞碌碌咁工作,但就無足夠嘅空間、寧靜,去沉澱一下。「國寶松江城馬拉松」呢隻日本馬,就係日本大熱馬拉松以外的一個好好選擇。

筆者我跑海外馬嘅經驗唔多,列一列出黎比較下先:

如果大家有有興趣參加下年嘅「國寶松江城馬拉松2020」,可以參考一下我嘅3日2夜行程:

Day1 (Sat) 香港 -> 米子空港 -> 松江市內
Day2 (Sun) 馬拉松日 + 慶功晚餐
Day3 (Mon) 遊覽出雲大社、松江城、松江市跨市大橋 -> 鳥取市 (JR大約要搭2.5hrs / ~3500 yen)

國寶松江城馬拉松大會網頁


文章為作者意見,不代表Fitz立場。

歡迎投稿: https://fitz.hk/contribute/

廣告