政府圖片

點解會跑步?幾時開始跑步? 點解堅持落去? 點解跑到連生活方式都改變埋? 點解仲要俾咁多報名費都去跑,甚至乎抽一個同『對話會』差不多難嘅籤去跑? 仲要飛埋去其他地方跑? 仲要追時間? SUB乜SUB乜又ULTRA又點又六大? 點解受傷都繼續跑?

除咗流咗好多汗,使咗好多錢之外,其實跑嚟係為乜?

健康、減肥、靚、型、潮流、挑戰、友情愛情親情、情緒、生活壓力、鍛鍊、喜歡攞苦嚟辛,全部都可以係原因……

或者最大嘅原因,係『跑嗰個就係我,我就係會跑嗰個。』

圖: 立場新聞

點解香港人越嚟越多人跑,多人比賽? 因為跑步包含住好多我哋『TAKE IT FOR GRANTED』嘅自由呀?


買鞋買衫: 唔一定要因為你邊個國籍就要買邊國家嘅牌子,純粹因為佢好跑同自己夠錢買,你買得再貴都一樣唔識飛。

報比賽: 夠長、夠好玩、夠多高手、紀念品夠靚、夠補給、夠特色,有時間又夠錢咪報,唔使理佢邊個主辦。

練習時間: 朝早又得、夜晚又得、放假又得、返工前放工後、午飯都得,晨運咁早都得、半夜三更又得,總之你有著衫出門口,唔裸跑就幾時都得。(裸跑就睇原因啦)

練習方式: 去GYM又得、去運動場又得、跑山跑路跑樓梯都得,長課、TEMPO、SHUTTLE、INTERVAL、RECOVER 都得。

海外比賽: 免簽證嘅地方都足夠跑到你腳斷啦。

圖: 亞新社

作為一個跑步嘅人,對自由嘅要求都好低,都唔多人會相信有真普選、幾多超支同利益輸送都係鬧兩句,DQ完我聽日都係繼續跑步,明日大嶼係要過都吹你唔漲

但係…
宜家夜少少都費時出去跑,驚俾警人拉
路過連儂牆又驚俾人打
成櫃黑衫黑褲著之前都諗一諗
跑個步前要諗如果要坐車返,地鐵有無開
(如果仲敢) 去內地跑仲要先處理好手機、海外馬完會唔會入唔到境
跑步 GROUP 入面又會嗌交,吓吓都要先了解職業
報比賽又要睇主辦,真心唔想益D賤人
跑完又驚食錯顏色
最重要最重要宜家唔敢唔帶身份證出街跑,要喺新屋嶺跑返屋企唔係怕遠,係怕盪失路。

曾經大家都咁鍾意跑步,係因為對業餘跑者嚟講,有一個普世價值喺當中。練得多,跑得快。跑得多、捱得耐。億萬富豪未必快過廢青,大隻佬又未必夠細路跑,男人都未必夠女人跑,無人理你收入幾多,邊個國家,大家睇你肯付出幾多,有幾勤力,跑幾快、跑幾多,跑得有幾靚。CAM MAN 都可以快過速龍。

大家尊重地心吸力同相對論。而各自修得到嘅都唔同。

我鍾意帶人跑、陪人跑,因為大家可以一齊公平又多元咁成長,睇住更多更多嘅新手享受到跑步嘅自由,真係又係愛又係責任。

只要你一日都堅持跑落去,自己就有人俾你影響到。呢個亦係獅子山精神隊嘅精神。我知道有錢都應該先幫香港人,我知件衫又藍又紅就會聯想到打人嘅TEE,不過又黃又黑又何嘗唔係有危險呢?

有心做嘢人,要繼續努力,努力去搵個出口,去抖抖氣。如果你都認同獅子山精神隊就呢幾日填埋張表訂衫啦,幾多幾少係有意思嘅都要照做。

無論明天如何,能跑都繼續跑下去。

一起堅持想跑就隨時隨地起跑的自由吧。

P.S. 其實係咪可以搞個環地鐵暴龍跑,和平表達訴求? 不過都唔會有不反對通知書,到時又要同速龍鬥快就無謂啦。


[獅子山精神隊2019] 繼續向高山舉目 慈善隊Tee訂購

獅子山精神隊由2016年一路走來,去過韓毅、集合精神復康嘅朋友與醫護 full team 完走毅行,嘗過40人 support team 的愛護,上過獅子山,登過富士山,走過一次又一次麥理浩徑。從香港的山,向世界出發,從不停步、愛心友情沒有止盡,並再一次下定決心,完走剛好40週年的麥徑。

今年獅子山 Tee 沿用上年設計,男女裝合併可以組合出一條完整毅行路線,而終點改成珠海學院。另外,亦特別準備了童裝。色調上是男 (藍) 加女 (紅),變童 (紫),從設計上貫徹傳承的精神。

定價方面是$200一件,$300二件,$400三件,如此類推。扣除成本約$80 (連郵費) 後,先撥捐樂施會,以確定下年參與權,並會積極考慮其他受助團體作捐款對象。

截止訂購日期: 10月6日

訂購詳情: 連結
立即訂購: 連結

Fitz連結: https://fitz.hk/?p=126126

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告
Law少 許耀斌
人稱Law少,前電台主持及監製,酷愛體育運動,多次參加馬拉松及毅行者活 動,近年更嘗試進軍三鐵及渡海泳。對於跑步、對於行山、對於比賽,均有深刻而令人動容的看法。著有《原來在沒有盼望 的地方才需要盼望》。