早幾星期,Support 隊友玩逆走50,隱約聽到一位山界 Ching 話:「玩50K嘅山賽,唔需要靠其他人補給,自己搞掂曬,先至係有料。」

無可否認地,呢位 Ching 的確係好有料,當佢講完呢句話,就係佢50公里衝線一刻。

喺我眼中,所有完成50 / 100公里,無論時間快與慢,都已經係一位強者,每一位都十分值得尊重,整個過程,都有佢可歌可泣 (的不要了) 嘅體會。

24小時內完成到100公里,係實力嘅表現;24小時以上完成到,係堅毅同意志力嘅表現。

Solo 100K,全程自給自足嘅跑手,絕對係實力、應變能力、心態、意志嘅考驗,的確值得佩服。但如果你問我,我更加鐘意搞一場「大龍鳳」,一大班人一齊去玩一場100公里山賽,能夠將跑步一件咁個人嘅事,演變成一件熱血、具 team spirit 嘅事,更加難能可貴。你會發現,人與人之間嘅聯繫,會由跑手與花生友 (Supporters) 之間開始。

係開始包膠之前,除左要多謝 ViuTv、同我自己之外,比起呢2個單位,更重要係要多謝身邊一班同行隊友及 Supporters。一個人未必做得好嘅事,聚集左一班人,就一定會做得好。無一班神經質嘅隊友,話報名就報名,我係絕對唔會無啦啦報名玩100,報個名唔難,最難係搵到一班陪你一齊癲嘅人;其次絕對係要感謝十幾位 Supporters,7個人玩100K,要動員十幾廿人,絕對係「大龍鳳」,就咁睇以為 Support 好易做,指定時間去到指定地點咪得囉,咁樣諗得實在太簡單。一切由事前準備 runner schedule、各CP人手分配、車手準備、路線、CP野食野飲物資、當日應變部隊嘅應變能力、On duty 幾十個鐘,凌晨時間起身,然後再等到天荒地老,當你做過就會知道,隨時做補給仲攰過跑場100。

致所有 Supporters ,用完成比賽去表達對你地嘅謝意!

Eric、Karen、Pi、Chi、Fi、Koobee、Joyce、Priscilla、Wendy、尚霖、飛龍、Cyrus、Yvonne、Will、Ca姐、Yan、DOL、Hong9,沿路見到每一個你,都係一個完成嘅動力。

0-27km 元朗大棠 – 大帽山扶輪 (Lap time: 3hrs 26)

比賽前,要交 CP schedule,知道今次 VR 比賽改左路加距離長左,都唔太識預算 (其中一個原因無試過路haha),再加上幾個原因 1. 賽前1-2星期氣溫飆升 2.無神神肚痾左好幾日 3. 賽前練習嚴重不足…同盛最後一課雙坳練習都淨係練到30k….,報名果陣仲同盛目標做Sub-15,即刻對今次比賽抱著持有可觀望態度。最後就交左個18hrs30mins嘅 schedule 出去。

真係好好彩,起步果朝早落著微微雨,全日都無太陽見過太陽,頭27km基本上都係落住毛毛雨,有利降溫,不過就唔記得帶帽,就變左洗濕個頭咁”醃”住對眼,對於有求必應嘅Supporter,我係途中想拎返頂帽帶,最後呀Fi可以連自己頂帽都比埋我,果下真係好感動。同呀盛你追我逐咁,好快就去到圓譈民安隊Camp site,接過 Fi & Joyce 補給,就繼續向大帽山出發 (Btw Supporter 真係唔易做….落住雨、行入民安隊 Camp site 等成粒鐘先 support 到,萬分感激)。然而我兩繼續採取你追我逐策略(原因係盛落山快;相反我上山快,所以基本上係唔岩腳),聽住歌落住雨,好快就到扶輪 27km CP,突然如夢初醒,咁樣就完成左四分一路段。有F1入pit 補給嘅速度,Fill 水、餵食、換垃圾袋,十萬樣野係3分鐘之內完成曬,絕對要靠 Pi、Koobee、Priscilla 幫手。去到呢刻再計一計數,比原定預計需要4hrs先到扶輪,早左30分鐘有多,開心仔左一下,偷多左時間用,touch wood 之後爆計都仲有時間zip。

28-44km 大帽山扶輪 – 城門水塘  (Lap time 2hrs 16 ; Total : 5hrs 43)

隨著完成左四分一路程,心態變得更加輕鬆,聽住歌好快就上到白波頂 (Aftershockz 骨傳導耳機真心係我操山良伴)。之後就一路四方山、鉛礦坳、草山、針山,大部份時間跑到嘅路就keep住跑,上斜、上梯就Power walk咁去,節奏快,但感覺還可以咁順利完成帽草針。當落到城門大壩,見到 Lap time 先2hrs1x,心中打左個突,平時練針草帽都係2hrs2x,最快只做到1hrs59,今日100K入面分段竟然做到2hrs16,唔知應該開心好定擔心,開心做到時間,擔心頭50K跑得太多,尾50K捱唔住,同埋未試過44K山入面,有7-8成時間都係keep住跑,所以有少許擔心之後嘅能力應唔應付到。每次落完一個山頭,除左見到石屎路/車路開心之外,最開心一定係見到 Supporter,都好感動佢地會隨時 Stand by 去 support 你。感謝城門 Supporters 仍然有求必應,仲有時間幫我去準備止肚痛藥。入Pit之後,基本上就係同時間嘅另一場競賽,自己限定左每個CP只停留5-10分鐘,留得越耐,越唔想走,個人就會越頹。

由於時間關係,會將所有要食落肚既野,唔理好醜,一次過混合埋一齊吞落肚,最緊要飽肚。同時心入面盤算黎緊schedule,發現只要keep到狀態,就有機會做到15字頭,果刻全身嘅血突然飆升幾十度,「熱血」感覺應該就係呢種,同Supporter講左句,想試下做15小時,希望佢地配合到 schedule。

44-55km 城門水塘 – 沙田坳 (Lap time 1hrs 36 ; Total : 7hrs 34)

同時都相信呀盛會好快追到上黎,廢事比佢係所有落山路段甩街,唯有加快步伐….繼續有路就跑,跑唔到就 power walk,順順利利咁完成左頭56k去到沙田坳道獅子亭….麥六基本上都係跑得好開心嘅路,一過完鷹巢山自然教育徑,就係惡夢開心。一下子要泵上筆架山白波,仲要每一級都好大,唔好好好分配體力,好快會Chur爆。當見到白波之後,基本上就係開心路段,一直慢落至沙田坳獅子亭,呢段路keep住慢跑,同時都比左自己時間Recovery,之後打尾三大佬「麥四」。麥六至麥五落段,相對輕快,技術難度較低,未去到CP已經好肚餓,最後衝到落獅子亭,見到 Support 嘅 Wendy 同 Samuel,感動嘅感覺再次出現 (雖然少左2個人),因為比原定 schedule 早左個幾鐘,搞到 Supporter 要趕頭趕命出門口 (真係超級唔好意思),一去到仍然有求必應,汽水、杯麵、生果,Refill要乜有乜,無大家幫手爭分奪秒,都好難做到今次咁好嘅時間。

55-72km 沙田坳 – 水浪窩 (Lap time 2hrs 32 ; Total 10hrs 16)

離開獅子亭,意味住比賽已經完成左一半,同時可幸嘅係,身體狀況仍然甚好,感覺要「行完好無行一樣」,姐係話黎緊我完成整場比賽嘅機會率又大增。隨住今朝落完雨,進入麥四嘅路段都比較潮濕、係樹林入面、路況亦都比較多坑,對於跑山0技巧嘅我,都係小心為上,目標係安全完成,所有事情直至M078前都係咁樣。真正嘅挑戰由M078落山開始發生,落左成朝雨過後,落山路段滿佈泥濘,而且落山路段級段非常大,好多位置仲要”Sin“住落,落左5分鐘都唔夠,就即刻”Sin”左一”Sin”,好彩嘅係,我唔係向前仆街,而唔好彩嘅係….我向後“Sin”成個patpat坐低左,繼而聽到一下清脆嘅爆裂聲…回過神後就發現…我坐爆左部iphone,成部電話9成玻璃爆裂…而且…成部電話彎埋,成個股型出左黎,當堂頹到一個點,無諗過玩場比賽,要賠上部電話…之後一直落一直落,沿落Sin左十幾次,成對鞋嘅 Megagrip 都被泥濘填滿左,變左平底鞋,而條白色T8都隨住仆街過嘅次數增長,都逐漸又純白色變成「賴屎黃色」..落到水浪窩馬路,真心已經冇左一大半心機,心入面仲係到諗,會唔會因為仆左呢十幾次,而錯失左好多時間,

不過都無諗咁多,因為已經冇曬心情。直至見到Supporter Eric Karen Yvonne,幫手準備左入 Pit 嘅一切,係山頂突然好想要一杯暖嘅咖啡提神,落到 CP 就即刻有,呢刻真係好感動! 落山之後,成身泥漿,好彩有你地幫手清潔,之後先令個人感覺無咁頹廢。然後同Supporter提及到爆左部電話,之後已經無曬心情,甚至連繼續跑落去嘅動力都消失埋,再加上頭先麥四嘅路段已經咁惡劣,心諗麥三呢個大大佬一定更難挨,棄賽念頭浮現左一秒鐘,但一諗到 Supporter 都付出左咁耐時間,就話比自己聽點挨都要挨埋返去。係 CP 停留左10分鐘,就繼續展開頹廢之旅…

72-82km 水浪窩-北潭坳 (Lap time 1hrs 56 ; Total 12hrs 26)

唯一值得開心嘅係,跌爆左部電話,但佢仲繼續聽到歌,好彩有佢陪多我2個鐘,如果唔係我一定會訓著。成段麥三都係我最憎嘅碎石落山落,加上麥四嘅泥濘攻勢,麥三採取嘅策略係全程Power Walk,安全完成呢段路就算,時間唔係重點。好彩嘅係,全段路10km,大部份路段都係乾爽,無泥漿,行得相對開心,同時好順利咁過曬雞公、雷打石、牛耳石,當上到牛耳石山頂,感覺又鬆左一口氣,終於又打完一個大佬,淨返最後大佬「西灣山」。然後一直滾動住沖落山,直至北潭坳,一見到馬路,同時見 Will Ca姐Yan DOL,果一刻真係好興奮又感動,辛苦完一輪,見到一班朋友已經準備好曬去支持你,果種感受要參加過先會明白。

入CP最爽一定係咖哩海鮮合味道,呢個味精湯簡直係人間恩物,飲完就好似食左「偉哥」,成個人會即刻精神曬,加上係牛耳石吹左好耐風,成個人吹到好凍,呢個可以話係一個救命湯,呀Will放心,我一定會選你地做最佳CP。要粥有粥、要飯有飯、要杯麵有杯麵,唔講以為去左Buffet。呢刻時間去到12hrs30,計一計仲有2hrs29 時間完成餘下23km路程,好似好簡單,仲有好多路跑,但仲有西灣山大佬未打,加上準備入黑,知道自己狀態一定會大跌,所以都仍然係50 50信心,然後問左呀 Will一句,2hrs30跑麥二麥一難唔難,佢用左一個唔確信嘅眼神答我「唔難丫」,我就半信半疑左即刻出發….心諗都黎到黎到,衝埋佢先算,無論做唔做到15都好,都叫PB到先。

82-105km 北潭坳 (Lap time 3hrs22 ; Total 15hrs 58)

去到呢刻,已經係黃昏5點半,離日落時間淨返個幾鐘,為左減少入黑後狀態大跌嘅機會,目標由北潭坳至西灣村路段全程快跑(當然唔包括上斜),因為突然消耗左好多體力,去到西灣村即刻隊左罐汽水先,老闆娘仲叫我唔洗急,坐低慢慢飲。時間一分一秒咁過,距離15hrs59mins59淨返唔多時間,全程乜都諗唔到,淨係識望住條路狗衝,計到岩岩好最後東壩10k段要keep住跑5’30/pace,上西灣山要 keep 到14’00/pace 內先 meet 到 target,好好彩,衝到西灣山頂先日落,然後衝埋落浪茄,上埋最後一段石屎路,出到東壩盡頭,時間去到15hrs01,當堂鬆左一口氣,Sub-16嘅變數又再減少左,餘下10K只要58分內完成就可以。好耐未試過呢種熱血感覺,好似跑極都唔攰咁,雖然腳開始痛,不過都唔理咁多,即刻食左2包gel、2粒止痛藥,就開始最後10K。跑極都未完嘅麥一,係上白臘村同東丫村嘅大斜路上,大聲嗌左幾次,點解最後10K仲會有咁多上極都未完嘅斜,而且時間仲一分一秒跌緊,2條各接近700m嘅上斜,望住隻錶 current pace 跌到落去6’30/km,即刻無行路嘅念頭,繼續死頂埋上去,直至去到上窰效遊徑前大落斜,終於望到希望,淨返最後1.5km,時間係15hrs50,真真正正鬆一口氣,直至終點前,呢10公里無停過咁跑。

衝線一刻,感謝全部朋友走左出黎 Support,如果唔係有你地幫手爭取一分一秒,都唔會做到今次時間。一直都好想好想做到Sub16內嘅成績,但今場比場距離長左、練習嚴重不足,賽前只練過4課,再加上個肚又唔爭痾左好幾日,做到15hrs58真係意料之外嘅事,如果無大家嘅 Support,真係絕對唔會做到,仲有同場一齊鬥嘅6位隊友,盛、KK、Hong、Hugo、輝哥、Paul,無你地一齊玩,一定唔會咁熱血。
之後再出一篇文介紹骨傳導 Aftershockz 耳機 + Garmin Enduro 新錶,呢兩件裝備係呢賽比賽上幫左我十分之多,感謝。


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 麥徑天擇,逆者生存。逆走100 賽後報告