Fitz > 運動 Sports > 跑步 Running > [再戰苗圃] 由「梗頸四」到冠軍 從失敗中學習
感謝非苦隊長既教導,亦有幸跟過高手拍跳學野,成就我進步不少!

玩左2年越野跑,終於一嚐 Solo Podium 的滋味。上年係小弟第一次玩苗圃,傻下傻下之下衝左個「梗頸4」番來。(詳見:《[苗圃42K初體驗] 我和針山王的16K》)。今年再次出戰42km,本身見到曾小強都玩,所以開頭都無諗過有冠軍的可能。只係目標比上年時間做得更好就滿意,名次方面雖有寄望,但都同自己講盡力就可以。

在排名牌上,看到自己的名字在冠軍的一行,真的有D激動。 (按圖放大)

老實講,今次真係可以話係走線成功,因為今年增加左51公里,好多外星人上左51K。避開左D高高手。先有機會偷雞成功 ~ 哈! 而最開心係做到更好的時間,由上年5hrs 37mins >5hrs 8mins,雖然衝 sub-5 失敗,但PB左近半個鐘都好開心了。


長途比賽,帶 pole 可有效分擔雙腳體力消耗 Photo Credit: Stanley

吸取上年經驗,從中學習

上年準備及經驗不足,經過上年後,對路線已有一定的認識。 首先,今年刻意不停提醒自己要保留實力,唔好死衝。另外,上年亦因頭段太快,後段上草山石屎斜路輸掉不少時間,所以今年都帶Pole 上陣,希望減輕雙腳疲勞,在幾個上山路段,如東洋山,草山都慳左唔少力,有助保留體力在平路,落斜追時間。

另外,在 CP 停留時間亦刻意減到最少,每個 CP 的停留時間都不多於1分鐘,只係裝水+攞野食 > 走人,其中有2個站計過夠水就直頭「飛站」,寧願慢行作休息。因為每停1分鐘CP,你要付出既體力去追番,係唔止1分鐘既體力。所以大家如果計好數,夠水夠食物就可以減少 hea CP 可以賺番好多時間。

CP就像毒藥,嘆完要還的
由鉛礦坳飛落大埔,呢一段路成致勝關鍵 Photo credit: Yau Gor

認識自己強弱,Listen to your body

比賽中,其實往往最容易輸俾既人,未必係對手,反而係自已。比賽大忌,人快你快,跟人 pacing,見到人地係前面就死跟死追,到頭來爆既就係自己。 所以高手成日講要 listen to your body,要了解自己既特性,重點係:攰就一定要休。例如,當日其實本身我同第2名個位師兄一直係咬著咬著,去到城門水塘,我已經開始有抽筋同疲態,一下子被師兄過左。當時我知道再谷自己就一定會爆,所以我決定放開名次,俾自己慢慢回氣,城門水塘段其實我沒有跑足全程,反而是跑3-400米,休5-10秒,不斷保持這節奏的走法,令我回復不少體力上草山,再在最後一段拼盡一博。

終於可以慢慢享受衝線一刻既感覺

當日第2名位師兄,真心欣賞佢既靱力,我估師兄應該似係路跑底,在城門水塘俾師兄過左之後,去到鉛礦坳 CP 都未追到佢,最後去到落大埔既亡命斜先追到師兄。小弟自知上山弱,平路同路跑人比又沒優勢,反而落斜是較強的一環。所以即刻開盡6波飛落大埔 (完左睇番成績,尾段pace係4:40),就靠最後一段反勝衝過終點。攞到第一個山賽個人冠軍,得來不易。

比賽中,有時放鬆下,笑下,玩下,先係最有效既 supplement Photo credit: icefox

放鬆心情,享受比賽 (心態決定境界)

今次最開心既除左獎項外,更重要既係認識到自已,同埋提升了自己心理質素。因為有時放開時間,名次,對手。享受山賽,與伙伴一起跑山的樂趣,先係最大既動力。比賽中,有時放鬆下,笑下,玩下,先係最有效既 supplement。

大佬玩 26K都一齊PB 左,勁


更多:
Fitz Facebook專頁
[大脾罅救星] 從未如此舒適的短褲仔
[越野跑鞋的GTR] Salomon S-Lab Sense Ultra
[潮流興玩帽] 識襯一定係襯「佢」 (Bike Cap)
[有毒慎入] 識玩,一定要帶女友去玩呢個 (前篇)
[怯~你就輸了!] 一對踏上大賽頒獎台的地球人
[苗圃42K初體驗] 我和針山王的16K
壞人 Ryan@Fitz
Fitz Running 跑步


文章為作者意見,不代表Fitz立場。