快閃曼谷

渣打馬拉松係全球10個城市都有舉辦，除咗我哋好熟悉嘅香港渣馬外，係亞洲區有台北渣馬、吉隆坡渣馬、杜拜渣馬……當然唔少得今次嘅主角—曼谷渣馬。

曼谷渣馬係我今個跑季第三次海外嘅比賽，只不過我係跑界命途實在太坎坷，之前吉隆坡渣馬同埋BSN Putrajaya Night Marathon因印尼山火煙霾導致賽事取消，今次雖則順利舉行，但對於參與半馬嘅跑手而言，呢場賽事其實係另一場嘅惡夢。

呢次文章嘅標題—“快閃曼谷”，名符其實我係曼谷逗留嘅時間唔算太耐，雖然係三日兩夜，但實際嘅逗留時間只有不足40個鐘，故此我今次搭飛機就要坐豪啲，唔搭香港嘅航空公司，就坐阿聯酋航空A380，並不惜花額外金錢去程坐商務客位。坐得商務客位，上機前就要善用下個貴賓室。貴賓室入面嘅嘢食無論賣相及味道真係好正，加上美酒作陪襯，令我呢次快閃之旅有個好開始。

當我步入A380客機，品嘗杯香檳後，飛機終於起飛，當時我睇緊 “迷你兵團”並等待空姐送上飛機餐。今次係我第二次坐商務艙，呢次嘅飛機餐係我搭過咁多次飛機最正嘅，主菜就係Rack of Lamb，至於點正法，就要留意日後推出嘅Flight Review 。

去到曼谷Suvarnbhumi機場，當時已經將近午夜，故我一早已請求酒店方面派專車到機場接機，我到達酒店時已經係香港時間凌晨1點，check-in後冇幾耐就瞓覺。

今年曼谷渣馬拎Race Pack嘅地方係曼谷Makkasan機鐵站，當時人流都幾多但整體上尚算唔錯，果度仲有其他當地跑步賽事嘅資料同埋食嘢賣運動用品嘅攤檔，拎完Race Pack兼嘆埋杯泰式咖啡後，成個晏晝就係市內不同地方遊覽下，直到夜晚七點幾就返酒店休息，養精蓄銳迎接比賽來臨。

比賽當日，我坐Uber去到比賽起步點—Sanam Chai Road，去到比賽會場，仲有時間睇到全馬起步，全馬比賽開始後冇耐，我就寄行李並且熱身，熱身期間竟然 “野生捕獲” 一名穿必達會衫嘅香港跑友，當然就吹下水啦，吹左一陣水之後，佢亦去寄行李，而我就準備上線。

雖則我係跑半馬，但最終跑落嘅感覺好似跑緊石崗30km咁，比賽早段係跑上高速公路，跑咗十幾k，穿過Rama VIII Bridge後，先至跑番落內街，但跑跑下唔多對路，皆因跑落內街想大開殺戒之際，原來跑極都仲未返到Sanam Chai Road，當望到GPS錶到21km之後仲未見到終點，索性死頂捱埋返去，結果GPS錶度到27.6km，我要用左差唔多兩個鐘先跑完，結果年齡組別第8，成績公佈版上雖榜上有名，但與獎項無緣(因為年齡組別頭五名先至有獎)。

比賽過後，還有一點空閒時間，便由Sanam Chai Road漫步至曼谷火車站附近，乘搭地鐵轉乘BTS回酒店沖涼，然後收拾細軟前往機場，快閃曼谷行動就此完結。

後記
1. 乘搭商務艙其實並唔係大家想像中咁貴，以我今次揀阿聯酋航空為例，去程商務位，回程坐番普通位，連埋機場稅同埋附加費，只係大約3500蚊，亦係性價比比較高嘅，各位未坐過A380而又想一睹佢嘅風采，絕對值得一試。

2. 曼谷BTS、地鐵同埋機鐵係有安全檢查，大家要留意。BTS其實同香港地鐵一樣係比較迫，搭果陣要禮讓；曼谷機鐵相比起馬來西亞KLIA Ekpres 同埋香港機場快線，就真係相對地龜速，佢係似東涌線咁 “站站停”，當地鐵路網唔算發達，轉車/接駁較為麻煩。如果你唔係想試坐機鐵嘅話，最好就搭的士/Uber，因為當地搭的士/Uber其實唔算貴，我由酒店坐Uber去曼谷渣馬起步點附近，只係140蚊泰幣(大約31蚊港紙)，但有另一樣要留意嘅係曼谷塞車嚴重(特別係旺區)，所以最好預留充足嘅交通時間。

更多：
Fitz.hk Facebook專頁
[馬來西亞布城] Let’s Red to Putrajaya
渣馬系列．頭關—曼谷馬拉松
Fitz Running 跑步