Fitz > 運動 Sports > 跑步 Running > [怯~你就輸了!] 一對踏上大賽頒獎台的地球人
圖: 我的最佳拍檔Chris Szeto Photo Credit: Asia Trail

堅無諗過~地球人都有踏上頒獎台的一天 !

其實之前未玩過Translantau,想起當日組成 『Team of 梗頸4』,呢個無聊念頭來自苗圃攞第4後再加上 Chris 針山十登又攞第4。直到報完名,見到 Runner List 有 2XU UFO Team 鷹鷹+楚健,神人Jonathan Lau,仲有一堆全馬跑Sub 3 既高手,加上 Translantau 係大賽之一,仲有好多隱藏既外地高手,所以賽前已經冇乜期望,心諗最後真係做番『梗頸4』都已經算係執到。最後同 Chris 傾好拼盡全力 Target 做時間6:30-6:45就算~

賽前計好數要 50km 要做 6:30-6:45,係絕不輕鬆。頭27km是平路居多,而後 23km 上「伯公坳>大東山>老虎頭」就上落較多,而且比較崎嶇。要衝到好成績頭 27km 一定要『先爆為快』,3個鐘完成,再唔跌 Watt 地用3:30完成最後23km。

我同Chris一直都屬於唔同類型既跑手,我個人在平路及落山較強,Chris 則是上山及耐力較強。但要衝擊獎項,我地兩個都必須要克服自己既弱項,所以最後我地決定拼死一博。頭段,Chris 死跟我跑,後半段我跟 Chris 死撐上山,爆又好撞牆又好,去左先算!

圖: 了解你既隊友,互補不足 ~ 係隊際比賽最重要既一環! Photo Credit: FreeBird(運動筆記)

開賽了,槍聲一響,我同 Chris 一齊衝出人群先佔一個較前的位置,但只見 Vlad Ixel、鷹鷹、楚健等高手的背影越來越細粒,過左10分鐘直頭影都無埋 (心諗:地球人是如此渺小….)。

跑下跑下~轉眼到達了 CP2,好奇心下拎出手機上網睇下自己排名,望一望嚇左一跳,當時個人排名我竟然係第6,Chris係第7。即係我地計Team係第3名,簡直係 Unbelievable !!!!

我即刻擰轉頭同Chris講: 我地而家排第3 !

之後去到 CP3 再 Check ~ 再嚇一跳我已進佔到第4,Chris係第5。跟著再睇睇Whatsapp,在背後不停更新戰況的Captain Chan 話: 第2隊的其中一名隊員退出左你地而家係第2名呀!!!!! OH MY GOD !

圖: 全程第3隊追足我地50km,有一刻我以為我地2個掙佢地好多錢~
Photo Credit: Clement

去到最後23km,我地同第3名既比拼已經進入白熱化階段。佢地由起步同我地足足鬥足 50km,過程中我地互互片既狀況,不斷重覆不下十次。我相信個一刻只要有其中一個意志力差D都已經輸左,當時我內心不斷地『XYZ』叫自己『頂L住』。

圖: 衝線後一個虛脫的軀殼,我同Chris 講: 我真係好叉攰, 個2條友Short 架! (haha)



去到最後 2km 石屎樓梯落沙灘時,我回頭一望見到個2位師兄發力狂追上來,我當時心諗: 我好X攰呀 ~ 放過我啦…….我同 Chris 講我跑唔郁啦 ! 跟著 Chris 使出如來神掌推了我兩下,同我講 : 頂著呀……我地係亞軍啦……..一聽『亞軍』兩個字,我即刻好似飲左 Red Bull 咁……..衝呀 !!!!! 就是咁的~ 最後我地險勝1分19秒奪得亞軍 !

終點線上,一個虛脫的軀殼終於可以倒下了!嗰一刻,我相信只要配合天時地利人和,原來凡人都有能力製造爆冷戰果。

P.S. 冠軍的 2XU UFO TEAM 非常正路的『完爆』我地,快我地1個鐘9分鐘 (沖個涼、食個TEA,我地都未到) !

完 ~

圖: 阿媽,我得左了!   而亞軍獎品係唔會有人岩 SIZE 既 T4 Compressport ! 好野 ~
圖: 火拚過後,我地4條旦散化敵為友! 有位師兄仲話要下次再鬥過 (心諗: 仲嚟,唔係呀fa)

更多:
Fitz.hk Facebook專頁
[全馬初體驗] 全馬同100km 邊樣辛苦D?
[真·龜兔賽跑] Tailwind Trail Chase 2016
識揀,一定係揀跑「山」女做女朋友
壞人 [email protected]
Fitz Running 跑步


文章為作者意見,不代表Fitz立場。