Fitz > 運動 Sports > 跑步 Running > [我的初馬] 名古屋 長跑之戀

 

繼去年四月台北初半馬後,再一次一個人在外地比賽,今次需要更大的勇氣及意志,因為這是我的初馬!

年前第一次10k、初半馬,一年後是我的初馬「不求最好,但求進步;今日的我打倒昨日的我。」

其實我可以在香港跑我的初馬,因信心未夠或者想遁序漸進,我想做到一個自己滿意嘅半馬成績先,再有足夠嘅練習才去跑我的初馬,加上日本嘅馬拉松是令人嚮往的😍

去年9月底得到名古屋馬拉松後補位置,心情一直很矛盾。不斷質疑自己能否完成這42.195公里?! 自問我真係冇乜天份,速度吾快,耐力未夠,又吾夠勤力,唯一仲有就係一丁點意志

我可以完成42.195嗎?
每當想到要完成一個全馬,最基本練習就係要做長課(LSD),但忙碌嘅工作一直佔據我太多時間,就連星期六、日放假都要on call😓,有時放工後跑10k都要好吃力才可以完成;時間、體力令我又再猶豫不決

正當心大心細之際,公司團隊分配、人事嘅變動,我決定暫時放下工作,專心練習;可能有人會覺得我好傻、衝動、任性,其實我有深思熟慮過,此刻金錢對我並不太重要,暫且給自己一個「悠長假期」,我要好好把握這個假期去完成我的夢想,可能這個初馬係我唯一一次嘅全馬,who knows

圖片來源: Warmup Girls

做到和做不到只是一念之間
踏入11月,正式放長假,亦開始我嘅練習計劃,假期只開始了10天,响一次夜跑落斜時竟然不慎跌倒,初時以為只係擦傷膝蓋,10天後傷口完全癒合,但行路時膝蓋仍痛,原來瘀血未散,莫想去跑,行都要就住就住;唉,我知我一定要完全停止跑步,直接完全康復

又一次膝蓋受傷令我的練習要擱置
直到11月尾,再開始重新出發,每次跑都吾敢加速,落斜時更害怕會再跌倒,我要克服心理障礙,响邊度跌倒就要响邊度企番身,而且另一個半馬賽事亦將至,所以要更加積極練習,幸運地傷患未有影響該塲賽事,亦順利完成另外兩塲半馬賽事,而每次賽事後都會自我檢討還有什麼要改善
順利完成三個半馬賽
其實身邊個’守護魔鬼'(註)不時叫我放棄「名馬」,有經驗嘅他一直覺得我未有能力去完成這42.195公里,亦擔心我嘅膝蓋傷患沒有完全康復!硬頸的我不停辯駁:「就算行我都可以完成」;此時,他一句說話向我當頭棒喝:「馬拉松係跑吾係行,百萬行先係行;作為一個跑者係吾應該去行馬拉松」(賽事中出意外仍堅持完賽者另計)

依句說話一直留响我腦海,所以我開始從新編排練習嘅路線;我要將自己嘅弱點改善,最怕跑上斜路段就次次都要上上落落,令肌力得以改善;以前只會晨跑、昏run、夜跑,現在卻愛上烈陽跑,我知汗水是不會白流的

每個人都有自己一套理念、方式去完成一個馬拉松,我都一樣,平時吾太喜歡比賽,吾想跑得有壓力,不過今次係想贏自己,我要做一個認真、尊重跑步精神嘅跑者去完成這個夢想,當然亦會好好享受這個海外馬!
愛上烈陽跑、上斜又有乜好怕
去名古屋前兩星期,第一次完成超過30k不斷上落斜長課,幸運地未遇上「撞牆」,加上’守護魔鬼’對我公開讚揚,令我整晚非常亢奮,之前辛苦嘅練習係值得的,亦為名馬打上一口強心針!

無痛無傷地完成一個有質素的長課
以前每年平均會去三、四次日本,目的就是shopping & eating,每次都係買到一喼去三喼返;但今次我係為我的初馬而去,為了實現自己的夢想而去

出發前守護魔鬼說我有機會在4小時30分鐘完內成我的初馬,聽到當然開心,但亦開始感到有壓力!可能佢亦感到我有壓力,開始不停提醒我什麼時候要補給、飲水,享受中去完成賽事。其實我夢想嘅初馬完成時間都係430,但從來都吾敢同任何人講,是怕被人取笑我不自量力!

Expo 影相都吾敢講自己真正目標時間

日本馬氣氛真係好好,大部分跑手都守秩序,賽道亦相當寬闊!沿途有很多熱心人士為大家打氣,我亦第一次比賽時會周圍望,而且一直都面帶笑容😊

只要肯努力,全馬不是夢「喺賽道上,每一滴汗水都係努力嘅象徵,而每一滴淚水,就係由汗水堆砌出來,遠比這條Tiffany 珍貴!」

終於順利完成我的初馬,完成後情緒非常激動,一年半前才開始跑步,從未想過我可以完成這42.195公里😭☺️,感恩天時地利人和令我順利完走!

能夠順利完成並不是我一個人嘅能力,跑步後認識了很多熱愛跑步嘅朋友及守護魔鬼,係佢地令我明白跑步係冇奇蹟,只有累積,要用好多汗水去換里數;亦得到佢地無私嘅分享、鼓勵及支持,係佢地令我跑出comfort zone,越跑越遠、越跑越強,亦終於體會到完走後嘅滿足感😊

當然我的守護魔鬼係最重要,佢對跑步嘅堅持、信念改變了我,仲無限量心身嘅支持、同軟硬兼施鞭策我,感受到佢比我還緊張😅;可惜去到40k時大腿抽筋痛到要停下來,多謝沿途熱心人士為我噴鎮痛劑,仍堅持要跑埋最後一段路,因為速度急跌,始終未能做到心目中的目標時間😔一點點失望,但亢奮多於失望
世事真係好神奇,一個由討厭跑步的人,漸漸喜歡上跑步;喜歡那種與自己對話的感覺,喜歡跑步後大汗淋漓嘅自己,喜歡突破自己。跑齡只有一年半,成績亦只是一般,這次我真的很開心成功戰勝自己!

其實跑步就如戀愛一樣,想好好保持一段良好關係,必須學會珍惜、包容、接受、欣賞跑步帶來嘅甜酸苦辣、喜怒哀樂!

從一開始跑步,就知道是一種辛苦嘅運動,偏偏有時越攰越想跑,因為透過汗水令一切壓力流走;跑步亦會帶來身體不同部位嘅肌肉痛楚、毛病、傷患,每當痛楚過後仍然會跑,下次再跑就會諗辦法去避免受傷,更加懂得怎樣去保護一雙腳;另外,跑步後膚色越來越黑,深深的背心印反而成為了戰績、令我更自豪;所有的缺點都變成優點,因為跑步會為我帶來更多開心時刻,令我自信、進步、堅強;每當有得跑就會好開心,由心笑出來,正如見到喜歡嘅人一樣。

人生總要跑一場馬拉松,希望有一天可以同守護魔鬼一齊跑全馬,雖然吾會一切過終點😅

「長跑之戀有高有低 有快和慢
難得的可跟你牽手 同步攀
長久的戀愛必經 流汗中轉個彎
沿途就算暫歇分散 沿途就算疲倦
怠慢只須尚有伴侶的愛 能繼續逛」

我會好好珍惜仍可以跑嘅機會,好好保護自己身體,期待再有機會在不同地方、國家起跑,因為初馬後還會再繼續挑戰這42.195公里😊

註:守護魔鬼~平時陪我練跑會為我開路、檢查路段是否安全、為我準備補給;但又會不停安排高難度路線、哩數要我練習



更多:
Fitz.hk Facebook專頁
[肥妹名古屋馬拉松追夢之旅] 夢想於漆黑裡仍然鏗鏘
[名古屋女子馬拉松] Tiffany完賽鏈的最後機會
令你走下去的十四金句
Fitz Running 跑步


文章為作者意見,不代表Fitz立場。