[新加坡渣打馬拉松2019] 為爭奪大滿貫名銜 封路三日怨聲載道

新加坡渣打馬拉松於12月1日舉行，呢個可以話係東南亞最重要嘅長跑賽事，總共有50,000人參加。不過，今年嘅新加坡渣馬嘅封路問題特別嚴重，市民終於頂唔順喺社交網站群起攻之。

根據當地媒體報道，今年新加坡為要爭奪大滿貫名銜，所以將比賽提升至「馬拉松大滿貫聯盟」 (Abbott WMM) 嘅規定。例如要將賽道全數封閉，只准參加者及大會車輛進入; 並且將賽事定為三日賽，增加 Fun Run 等活動。亦因為咁，11月30日黃昏開始 (新加坡渣馬於夜晚舉行)，共封閉超過90條街，市區大部份地方幾乎癱瘓，影響地區包括烏節路 (即如香港銅鑼灣)、Marina Bay (酒吧街，高尚住宅區)，以至CBD (商業區)。

有貨車司機話喺馬路塞咗2個半鐘 (平時喺新加坡一個鐘車程已經去到馬來西亞)，亦有結婚新人話佢哋嘅酒席有一半人遲到。

另一方面，咁啱得咁蹺，嗰幾日撞正新加坡有多個大型活動:

1. 國家體育館: 樂隊U2舉行演唱會
2. Suntec City: 舉行一年一度嘅動漫展
3. 烏節路商場: Black Friday 減價日
4. Gardens by the Bay: 迎聖誕大型活動

唔少市民反映，呢個周末佢哋出街連地鐵 (新加坡叫 MRT) 都逼唔上，就算好好彩出到市區，迎來就係萬人空巷嘅景況，十分嚇人。不過，市民亦唔係反對搞馬拉松比賽，而係希望將賽事移師到郊外，或者喺其他日子舉行。

呢啲市民嘅聲音如果傳到去WMM，唔知會唔會成為新加坡渣馬升格嘅阻力呢?

資料: 海峽時報、Mothership