Fitz > 運動 Sports > 跑步 Running > [武漢肺炎] 莫斯科疫情下舉行半馬拉松 近萬名跑手參加

疫情之下,東京奧運以至六大馬拉松都相繼取消,香港上星期亦有消息傳出,明年1月24日之渣打香港馬拉松亦可能要延期至4月舉行。面對全球疫情反彈,各國看似束手無策,但係8月嘅第一日,俄羅斯首都莫斯科,就舉行咗一年一度嘅半馬拉松,總共有超過9,500跑手,唔通戰鬥民族真係勁啲?

呢個星期日舉行嘅莫斯科半馬拉松,係首都每年一度嘅盛事之一。據傳媒報道同影片睇到,大部份跑手喺起點位置,都有戴上口罩同手套,起跑前亦要量度體溫,並且要保持社交距離。體育部長 Oleg Matytsin頒獎嗰陣就話,今次賽事成功舉行,顯示俄羅斯已經克服最困難時期,成功對抗疫情。

其實,莫斯科半馬拉松係原定喺今年5月舉行,但因為當時莫斯科封城,所以押後到8月舉行。截至8月1日,俄羅斯85萬宗武肺確診病例,係全球第四多嘅國家。

有莫斯科身先士卒,唔知會唔會為強國復賽打咗支強心針呢? 人無事先做到世界冠軍,大家最緊要都係保重身體啦吓。

 

資料: 路透社