Fitz > 運動 Sports > 跑步 Running > [渣打馬拉松2018] 純八卦非學術研究調查 你有咩想同大會講?
圖: Wing Leung’s Outdoor Blog

大考過後,人人爭住講感受。今年渣馬,你又有咩體會? 我哋搞咗個「渣馬2018純八卦非學術研究調查」,資料我哋會逐一分析。

*調查截止時間為1月23日中午12時,歡迎匿名填表,截至1月22日中午已有300人完成問卷

我哋整理咗部份跑友嘅個人意見,雖然可能係個別事件,但都係反映比賽實況,以下係部份精選:

「我真係好希望大會可以定期檢查下d廁所,冇水沖廁冇水洗手都係其次,我跑全馬本身已經跑到死死下,響西隧前忍唔住去廁所,點知一開門見到成地屎! 份量係一個洗碗盆咁多堆積成山嘅屎! 我即刻關門然後作嘔,之後已經唔去廁所繼續跑,但跑完成條西隧都仲係覺得想嘔同個胃好浪下浪下,我好肯定作嘔唔係我跑唔掂,而係因為見到呢個咁衝擊同無法忘記嘅畫面!跑完西隧再搵廁所去都一樣係個個有屎同沖唔倒廁又冇水洗手,呢樣野對跑手黎講係好大嘅心理同生理影響,希望大會可以正視! 好彩最後sub5倒,但果堆屎令我心理陰影面積極大! 如果唔係廁所咁污糟我應該可以跑得更好!」

呢位跑手嘅遭遇,簡直聞者傷心聽者流淚! 因為一篤……唔係,係一盆屎,打擊當時旺盛嘅爭勝決心! 可惜!

「見到啲大旗L就慶,要DQ佢」

「好多內地人參賽,不斷吐痰同自拍,討厭」

「Too many mainland runners, and they usually have bad behaviors such as pushing, spitting in front of other runners, make noise and line up.」

圖: Wing Leung’s Outdoor Blog

又咁講,講普通話、著簡體字衫,又未必絕對係內地人。我哋只唔應該只針對某一國家某一民族嘅跑友,不過無品嘅參加者,人人得而誅之。至於賽道上嘅問題,暫時就有呢啲意見,有彈有讚:

「今次嘅水站水源充足,運動飲品亦不太甜,非常好!」

「今年嘅sport drink難飲過屎。(利申: 未飲過屎)」(按: 咁重口味!? 你又點睇?)

「如果清場的工作人員在等待時吸煙不要對著跑手感覺較好」

「跑到半路唔係成日有蕉食,啲蕉都幾生sosad,同埋氣氛有進步,但都係一般,同埋衝閘好攰呀!」

「我被人踩甩鞋,起步嗰幾K大家都禮讓下啦!」

「灣仔會展段路太黑,無燈 好危險。Nike 氣氛幾好」

「渣馬環保d la,同埋試吓改條賽道多啲平路同入市區,全馬跑手冇咁辛苦,有多啲香港特色」

圖: Wing Leung’s Outdoor Blog

亦有唔少跑友對整體安排有唔少意見:

「田總學吓用email同QR code得唔得呀?」

「攞號碼布混亂,又話講環保,寄信又收唔到,去到要掛隊攞張紙再掛隊攞選手包,點解唔電子化,人地細賽都電子化啦!咁大個賽仲咁落後,要改變!」

「今年跑手完跑後,維園既人流管理好差,未能盡快疏導人群。」

「等後朋友區可以增加地方,今年好似特別多人」

「各方面都非常好,唯獨是跑完攞完行李,想去維多利亞泳池,出口封路安排極差。塞人塞左半個小時。」

仲有呢句,不過機會應該不大吧:「請田總放手,給其他機構主辦港馬。」 

圖: Wing Leung’s Outdoor Blog

最後小編一定要加埋呢句,真係一矢中的,like 爆:「地球真係一個好辛苦既地方」

重要嘢講多次,歡迎大家可入去「渣馬2018純八卦非學術研究調查」完成問卷,有人留言話「你問咁多野黎做乜」,都話八卦咯,同埋留低意見,未必可以改變事實,但起碼有得發聲,俾大會知先!

1月23日星期二中午截止調查,結果盡快公布!

問卷連結:https://goo.gl/QUjKUr

更多:
Fitz Facebook專頁
[渣馬Q&A] 跑完第二日 唔想痛到死可以做咩?
[伸展教學] 渣馬後記……秒殺酸腿! (有片)
Fitz Running 跑步