[渣馬備戰攻略] 2019中途退賽程序及截跑時間

由

2019-02-13

Fitz > 運動 Sports > 跑步 Running > [渣馬備戰攻略] 2019中途退賽程序及截跑時間

對於「跑得慢，唔夠快，無速度」嘅跑友，與其要佢哋研究邊個位加速可以快幾分鐘，倒不如研究點樣唔會被DQ! 享受比賽都有時間限制，今次為大家列出各項目及組別嘅拉閘及DQ時間。

2019半馬限時及拉閘情況

半馬分3組，分別為挑戰組 (05:45)、一組 (08:00)及二組 (08:30)。

主辦大會「香港業餘田徑總會」在比賽前一星期公佈新安排，半馬挑戰組 (5:45起步) 新增兩個截跑點: (注意: 半馬一組及半馬二組不受影響)

至於半馬一組及半馬二組，仍然維持限時三小時，中途無截跑點。呢兩組過咗限時，因為賽道仲未關閉，所以按慣例仍可以在繼續作賽，不過無完賽證書。咁跑到幾時? 就係根據全馬二組 (7點起步) 嘅截龍時間，所以就算8點半起步，四個半鐘內，可以完成21公里，1點前返到維園。

10公里項目 (不包括輪椅賽)，起步時間由05:45至08:15，分6組。限時情況如下:

當然，如果你真係好享受比賽，亦唔介意無證書，都可以喺東區走廊慢慢行 (不過我哋絕對唔鼓勵，因為咁會阻住其他參加者)。東區走廊喺最後一組限時過咗之後，即係10點15分正式關閉。賽道上嘅參加者，將由大會安排嘅接駁巴士，送返終點。

全馬限時6小時，更要準時通過以下關卡，否則會被DQ。

跑緊馬拉松，兵荒馬亂，未必可以記到呢啲時間。有人會選擇用配速表，將拉閘時間寫喺手臂上，亦有人Cap圖放喺手機，總之知道自己要趕路，就要搵方法記住時間。

要注意嘅係，當最後一組 (馬拉松二組，即係7點起步嗰組) 過咗限時，大會係會隨即拉閘截人。換句話講，如果你係全馬一組甚至係挑戰組，就算過咗限時，都仲有機會喺賽道上跑，只係無證書及完賽牌。

以下係2017年馬師道拉閘情況:

首先要明白，中途退賽唔代表你可以提早離開賽道返屋企，除非你嚴重受傷，要去醫院接受治療。

根據大會網站:「大會建議您在水站等候，並向工作人員聲明您要退出比賽，賽會巴士將接載您到終點。」即係話退賽之後，係無得周圍走，更加唔可以離開賽道自己搭車。而接駁巴士 (俗稱回收車) 幾時開車視乎供求及交通情況，所以隨時要等一段長時間，先可以返到終點拎行李。

另外，全馬、半馬嘅水站，每5公里一個。10公里水站在4公里及7.5公里位置。

記住，跑馬拉松並唔係參加毅行者，中途退賽係無得走人返歸的，所以為免飢寒交逼等待回收車，你點都要用盡全力準時返到終點!