Fitz > 運動 Sports > 跑步 Running > [渣馬報名攻略] 半馬 & 10K

渣馬報名攻略25號渣打馬拉松已經展開第一輪賽事,全馬參加者齊齊七點正捕喺電腦前面搶奪參賽席位。結果,個幾鐘頭後賽事宣佈結朿,總之有人喜歡有怨。報唔到唔緊要,仲有半馬同10K。呢個報名攻略,就係依據25號報全馬嘅情況,參考跑步群組跑友嘅經驗而製作。

1. 記得Refresh (F5)
未到報名時間上渣馬網站(即係朝早6:59分前),應該仲見到「即將報名」呢四個字。你咪以為佢一到7:00就會自動開門畀你。你係要喺報名時間七點後,再Refresh個網頁(撳F5),網頁先會開門畀你入去網站。不過,有電腦專家話,唔好搭正7點0分0秒就衝入去,因為網站呢啲時候太多人一齊入,反而會塞住,所以不妨等多10秒8秒就最穩陣。

「即將報名」搭正七點會轉做「現在報名」。不過記得到時到候禁F5。
「即將報名」搭正七點會轉做「現在報名」。不過記得到時到候撳F5。

2. 英文/中文/手機有別
跑Group朋友話,網站嘅中文同英文Version,都會有唔同待遇。例如英文網站會準時開門,而中文好似會遲咗幾分鐘。但中文網站條等候人龍又好似短啲。解決方法係一次開齊兩個瀏覽器(即係Chrome或Firefox),甚至開住幾部電腦。

至於手機,有人報全馬,最初10分鐘都入唔到去。但有人又話一路坐車返工一路用手機都報到。總之,呢個世界乜鬼嘢都因人而異啦。

3. 請稍候/HOLD
成功入到網站,首先要你排隊,等一輪就轉到第二個畫面。呢個畫面叫你揀唔同組別。不過,並唔係一定有得揀。遲咗入到去,會話「請稍候/HOLD」。呢個時候,你要不斷撳F5,等嗰啲報緊名嘅人中途離開(通常係信用卡過唔到數,或幫人報名人哋又甩底),咁你先有機會執死雞。好彩嘅,有人7:45仲可以報到全馬挑戰組,但有人撳咗差唔多兩粒鐘F5,仲只係見到個HOLD字。

所以,今年情況真係唔好搏,入到去有得畀你揀,唔好理邊組,唔好理係咪同啲Friend一齊,唔好嫌早嫌晏,報咗名先,唔係恨錯難返呀。

渣打馬拉松

4. 填表
其實唔使點講,簡單嘢,唔好填錯email就得(因為大會只係用email聯絡你)。而奇怪係,信用卡唔使入密碼,我真係唔知點解咯,好似有啲危險……

成功報名有個確認畫面,再等幾分鐘就會有正式email畀你。

5分鐘收到渣馬大會嘅確認信,30分鐘左右收到過數收據。

確認畫面
確認畫面
大會認確電郵
大會認確電郵
過數通知電郵
過數通知電郵

5. 全馬爆滿時間
7:10 跑Group流傳的挑戰爆滿時間 (有人話7:45都報到,但相信好個別)
7:30 公開組亦幾乎爆,入到網站,排完隊,就係畀人HOLD,撳F5撳到手軟了。
9:00 大會網站宣佈全馬爆滿,網頁關門。

6. 報名時間
9月29日半馬,10月2日10公里,10月5日輪椅賽。全部搭正七點開始報名。
今年只限有電腦有信用卡人士報名,無其中一樣,真係要諗辦法了。

更多:
Fitz.hk Facebook專頁
[鋼鐵之意志] 渣馬令我決心有「砍掉重練」的勇氣—激鬥前篇
搏一搏~! 單車真的可以變摩托~! (2015香港渣馬10KM記趣)
Fitz Running 跑步


文章為作者意見,不代表Fitz立場。