Fitz > 運動 Sports > 跑步 Running > 給「園丁」的公開信
Nike 10km Hong Kong 女子
編按:香港的NIKE 女子10K賽。有網民指出這賽事並非如園丁所說的第一個香港女子十公里賽事。

(編按:作者「園丁」撰寫的《點解香港咁少靚女跑全馬?(上)》和《點解香港咁少靚女跑全馬?(下)》,最近在網上爭議紛紛,Fitz.hk Blogger Karena出於義憤,寫了一封公開信,反駁他對香港女跑手的看法。)

園丁:

我好好奇,你究竟係以咩居心去問「點解香港咁少靚女跑全馬?」你(同埋你嗰位所謂的朋友)又憑咩資格去講香港跑全馬嘅女生樣衰?

如果你係想嘩眾取寵呃like的話,你已經失敗咗。因為我個人已經俾咗十萬個dislike你,未計網上俾你篇文得罪咗嘅絲打。

首先,我想提提你,在賽道上嘅女跑手,無論喺日本、台灣定香港,都唔係賽道上嘅陪襯品。我哋係去比賽,冇義務亦冇必要去做你哋班男人嘅eye candy,所以,我哋靚唔靚,身材好唔好,與你何干?

作為一個馬拉松嘅跑手,我相信你好明白練習同比賽時會遇到嘅困難,但對於女跑手,就算係你形容為Fun Runner嘅一群,有啲困難係你永遠都唔會想像到。

你哋男人跑步,尤其是大熱天時,好鍾意除咗上衫散熱。我哋女仔唔同,身上永遠都要著多件又緊身又難散熱嘅sports bra!未計有啲較怕羞嘅姊妹,無論幾熱都好,死都唔會除咗件面衫,就係驚俾你哋啲男人笑肥!仲有,我哋每月一次親戚到時練跑,邊跑就會邊feel到周身骨痛到爆炸,小腹痛到唔好話跑,就連行都有困難!

我唔係要喺呢度歌頌女性,人人平等,各自都有覺得辛苦嘅位,但我哋女跑手咁努力為咩?為興趣又好、為挑戰自己又好,絕對絕對唔係為你嘅一句樣衰囉!

最後,你一方面懶有心咁希望香港多啲專為女跑手而設嘅比賽,令女跑手「不必擔心遇上色咪咪的眼光」,但另一邊廂,你又希望見到女跑手經過時有「好多幻想空間」。你都好自相矛盾啫?算吧啦你,色迷迷的男人!

Karena

給園丁的公開信_002
按圖放大
給園丁的公開信_003
按圖放大

更多:
[辛苦跑嚟志在食] 快腳的煩音
Karena其他文章
Fitz Running 跑步


文章為作者意見,不代表Fitz立場。