Sophia係馬拉松新手，今年拎住份全馬跑手包，完全掩飾唔到心裡嘅喜悅，真係要攤晒出嚟寫篇開箱文。同往年半馬嗰份嚟比，呢次跑手包嘅份量好輕巧，應該係因為單張同紀念品份量有限（少其實好過多）：
四大張宣傳品，勉強都同跑步或賽事有關（BMW嗰張原來係宣傳柏林馬拉松）。但最令人奇怪，點解呢兩年都要送兩粒AA電池？記得舊年我拎住兩粒電，放咗喺號碼布晶片（我真係大鄉里，以為晶片要用AA電）！唉，我情願佢送包洗衣粉畀我。
不過，講無厘頭，都唔夠嗰位童軍小朋友，珍而重之親手畀我嘅紀念牌坊。除咗用嚟墊枱腳，我真係諗唔到有乜用途。
今年嘅T恤，無乜好講，都係X品牌贊助。特別係後面有幅地圖，或者畀人喺比賽時睇住自己進度啩（梗係望住人哋個背脊啦）。
最後到我Sophia期待而久嘅賽事手冊。
全馬賽事竟然有專用手冊。最特別係落齊全部選手嘅編號名稱，有咩用呢？威囉！（好似係）而高度圖同路線圖亦算詳細。（依然唔明點解唔一早俾選手）
最要留意嘅係「比賽時限表」，大家千祈唔好過鐘到Checkpoint。
選手手冊當然仲有好多「重要」資訊（如梁振英獻辭、勝出者獎金、開步及頒獎嘉賓〔咁遲出手冊唔知同呢一項有無關〕），我亦唔一一介紹咯。不過講開又講，同樣係大型競賽活動嘅樂施毅行者，佢哋可以早個幾兩個月前就派發手冊，而手冊有成大本贊助商嘅coupon，用嚟買衫買褲買鞋買襪買糧買水，雖然未必全部用得著，至少唔會得張單張，又或者畀兩粒電池你囉。
（注：舊年粒電原來仲喺度〔右〕）
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」
