這帖玩認真, 一點都不好笑的。友人家成熱愛跑步和山賽, 無奈另一半不大支援,規定在她清醒時不可以外出跑步, 朋友只好清晨四時靜俏俏起床換衫出外跑步, 四十五分鐘索完十tempo run後, 回家沖涼, 要神不知, 鬼不覺, 返回床同太太一起起床。跟過一次, 頂唔順, 左邊身都未瞓醒。
另一次,他申請到行街紙, 好鳩興地一起上蚺蛇尖, 上到頂, 收到奪命追魂call, 他即時同我講阿光, 要先行一步, 隨即碌落山, 我只見到他飛奔下山時的燈尾沙塵, 他應該破了落山最快的世界紀錄。
最後一次,他取到簽證去大嶼山twin peaks. 當天黃雨警告, 仍堅持上山, 因為可能無下次, 上到鳳凰山山頂, 我同他說好甘, 好辛苦, 他一句話KO了我, 呢啲叫辛苦, 兩個人相處好多時仲辛苦呀。我見到他憂傷的眼神, 也分不清他臉上的是雨水定淚水。之後, 我倆再沒一起跑步和操山。
剛剛聖誕節,去了他屋企BBQ, 靠害地他安排我跟他太太的姊妹一起坐, 傾計時, 其中一位C9 用燒烤叉指著我說你就係以前成日同家成跑步的阿光呀? 我都未答她, 她已經單打話跑步有乜為, 正打算KO條八婆時。另一條八婆按著我條燒烤叉, 加把咀話跑步都好過佢去叫雞, 幾時開始跑步要淪落到同叫雞相題並論? You can’t argue with irrational people, 當晚就是這樣給幾條八婆輪…著訓話。
對比之下, 我見過一些得到另一半支持的跑友, 真係零舍不同。前幾年, 我跟城大跑韓國慶州櫻花馬拉松, 一位師兄在廿幾公里左右跣倒碌了落山, 跣斷了左手, 一路係左手吊吊揈捱返終點。原來他是校友, 他叫我返到終點時找他太太告訴她因為跣斷手sub 4不到, 叫她不用擔心, 點都會死返去。因為我都已經爆偈, 只好拜託另一位師兄, 我只好陪伴他跑回終點。正如劉青雲講, 若有另一半的支持, 無論你是去了火星都好, 路程有幾艱辛, 她都有能力令你返回地球。當師兄一見到太太時, 便爆上前, 擁著她親吻, 隨即哭起來, 落淚不是因為痛楚, 而是感動。他太太只跟他說咁痛都捱到返來, 你好勁呀。男人最鍾意聽到呢句，係無?
跟著一年, 我再跑多一次, 因為櫻花賽道實在太美。我參加的團有一班師兄帶同太太一起出發, 太太們沒有跑, 只是來支持。我比他們早回到終點, 回到會場時, 見到太太們在不同攤位喪食, 當導遊說她們的老公正跑回終點時, 手裡個碗年糕丟都丟唔切, 拿著相機, 九秒九跑去終點, 在離終點一二百米狂影相。回到帳棚, 太太像F1換輪胎的team member一樣快手快腳按次序遞水,毛巾,補充體力的飲品零食等, 眾師兄就在狂吹剛才怎樣怎樣,邊吹邊把濕納納visor, compression, arm warmers, calf guard除下來,太太就一件一件摺好放進膠袋再放回gym bag. 單拖的途人丙只有能慨嘆這些機會不是屬於我們。
所以, have 是不會明白 have not的痛苦。珍惜在終點等你的人. She is the one you can’t live without.
只想補充我是明白家成太太的, 不懂用中文表達. She spells “love” T I M E.
本文原載於Facebook群組長跑長友，已獲作者授權轉載
更多：
Fitz.hk Facebook專頁
寫給陳C9看的跑步潮語解釋
渣馬—教曉我的二三事
Yiu Kwong Chan＠Fitz.hk
Fitz Running 跑步
愛跑步同港式抵死廣東潮語，sub-4是終身志業，希望以文章和跑步結識朋友。
