Fitz > 運動 Sports > 跑步 Running > [跑住食] 有如食自助餐一樣的那霸馬拉松

 

同幾位院友食飯,話題都係離唔開跑步呀,跑山呀,有乜嘢比賽好玩呀咁!當時,我突然諗起第32屆那霸馬拉松。那霸馬其實好特別,首先佢雖然係12月舉行,但那霸市屬於高溫多雨的副熱帶型氣候,所以平均氣溫都有成24,25度左右,大家要預咗跑熱馬!另外就係沿途多嘢食到好似 buffet 咁!

圖片及資料來源: 維基百科

呢隻馬絕對做唔到時間,頭半馬上斜上到 hihi,起碼用咗6成體力,加上好多時得一條行車路跑,勁塞人,所以都係 fun run 最實際!但呢隻馬仔氣氛好到不得了,大會冇提供嘢食,但民間補給多到你食到飽,我記憶中食過燒和牛,大量蜜柑,大蕃茄,忌廉蛋糕,冰條,牛肉飯,流水麵,蕎麥麵,八爪魚波,飯團,紅豆麵包……仲飲咗麥茶,可樂同益力多!啲power gel 根本唔需要出場!再加上那霸市民熱情地沿途打氣同 high 5,都令到所有跑者都樂而忘返。

但有兩點係跑那霸馬前大家必須注意嘅地方,首先就係天氣,前文講過呢隻係一隻熱馬,所以必須注意體力同埋身體狀況,就好似剛剛第32屆咁,大會話當日平均溫度接近26度,我相信唔止,加上太陽伯伯嘅威力,簡真係攞你命三千,搞到當日嘅完賽率只有53.22%。

圖片來源那霸馬官網

另外,就係大會嘅關閘時間。日本人雖然熱情好客,但呢方面大會真係嚴格執行,那怕只係淨返幾百米就到終點都照閘你,所以真係要多加留意,唔係真係喊都無謂。以下呢段片就係當日關閘嘅慘況!

後記

那霸馬限時係6小時15分鐘,我當日完成我嘅PW,一共用咗4小40分鐘左右完成呢 42.195 公里,但中途去洗手間同埋排隊食嘢係用咗半個鐘!所以大家如果有信心能夠連玩連食連等上線可以喺5小時45分鐘左右完成的話,我絕對建議大家參與。

好靚的完成牌



更多:
Fitz.hk Facebook專頁
[非理性討論] 跑步界的趷趷剛
[親身實證] 跑步的二三事: 中槍與裝備L
Fitz Running 跑步


文章為作者意見,不代表Fitz立場。