[香港馬拉松史] 香港長跑會 1978年的半馬拉松 (綠色半馬)

由香港長跑會舉辦的綠色半馬拉松，連續數十年在大尾篤/新娘潭道舉行; 可惜由於北區村民的反對，這兩年也不能順利舉行它的第40屆賽事。這個半馬賽事，相信是香港第一個有規模的半馬賽事吧。這個賽事，也勾起了亞霍40年前的回憶。

尤記得，當年亞霍想參加馬拉松賽事，需要有跑步成績紀錄。1978年11月12日的半馬拉松，順理成章，成為亞霍跑步生涯 (似乎”捱”字較適合）的第一個賽事。當年賽道由大尾篤停機坪起步，經新娘潭道落鹿頸，到谷埔村附近原路折回大尾篤停機坪。

是日一早，亞霍搭70號巴士到大埔 (70號巴士已於2008年12月7日停辦。當時行車路線是由佐敦道碼道開始，途經獅子山隧道，入沙田，再行大埔公路入大埔，往上水為終點站。) 再轉車到大尾篤比賽起點。可能有跑友問：點解唔搭港鐵? 哈哈，那個年代，仲係柴油火車呀! 班次稀疏之餘，還要轉多轉車呀。

亞霍報到後，做啲賽前預備: 換上絹質平腳短跑褲，用扣針扣住塊號碼布响件國產雙鹿牌棉質底衫背心先。呀，記得練習時，走得5~6哩，腳趾就會起水泡．嘿嘿，唔使同亞霍担心，有哂經驗，梗係一早已經帶埋棉花同膠紙。而家用棉花膠紙包住啲腳趾先。好嘞，著好對蜻蜓牌國產雙底白飯魚。型啩!

咦? 點解其他人唔同我呢個帥樣嘅 (騎呢樣)? 點解啲參賽者著住件有牌子嘅運動衫，質地好似唔錯噃。不過──車，咪又係背心一件!

咦? 條短跑褲──又係有牌子嘅，係就係幾有型；不過──條短褲起哂叉，似乎暴露啲噃，而家去海灘游水咩!

咦? 佢哋對鞋係西德 (當時仲分東德和西德) 名牌三塊葉嘅阿的打時 (Adidas)、仲有仆士 (Brooks)、喜歡你 (Nike)。唉吔，唔多對路，兼唔多好意頭，有老虎 (Tiger) 和美洲獅 (Puma) 添。呢啲老虎同美洲獅對住呢條白飯魚，結果會點呢? 著住啲名牌，係咪真係跑得快啲嘅呢啦吓?

咦? 點解佢哋未比賽就跑嚟跑去，搞到成身出哂汗嘅?

唉，都係唔好理班傻嘅。梗係留番啲力，謀定而後動。係咁而，拉拉筋，留力走13.11哩！(編按：哩，係英哩)

言歸正傳，是日天氣不錯，比賽在十時開始 (當時交通不同現時般如斯繁忙，所以起跑時間可以較遲一點)。“嘭”比賽開始! 唔理獅子定老虎，白飯魚幾大都跟住!

頭一、兩哩，啲獅子老虎已經跑出老遠，守住50位左右啦。

弊! 毒咒開始，點解雙手酸酸軟軟嘅? 走多哩幾兩哩，平時練習已經唔多出現嘅腹痛又發作添! 天啊，你做咩玩我?

攬住嗰小腹，唉吔，走到約4哩，真係醜死人囉，仲俾幾個女子追過咗！跑得幾哩就掉頭？馬拉松之夢就此完姞? 白飯魚咪好瘀皮! 頂硬上，慢慢走住先啦。

終於到水站，白飯魚飲過水，感覺稍為好轉。落斜入鹿頸到谷埔半程回頭。洗濕咗半個頭，條白飯魚又好似生猛番喎。走下走下，鹿頸回頭上斜，咦，前面唔係4哩左右過咗亞霍嗰女子? 好，後生仔點可以輸俾個女子? 幾大都攞番個彩，過番佢! 嘻嘻，掂咗!印象中，前面好似仲有一名女子喎，點解唔見咗？噢，明白，唔使問阿季，梗係上咗岸啦!

雖然話已值深秋，而新娘潭道兩傍有亦有樹蔭，但是氣温22-23度，兼且已是十一時多，日正中天，陽光充沛，膊頭開始曬到興興哋; 兩邊格拉底和腳脾內側又摩擦到損損哋。一擺手、一提腳，都隱隱作痛；情況更差的是瀝青路面就好像一只熱鑊，亞霍踩住對白飯魚落咗隻無邊大鑊，咁大隻鑊，白飯魚當然扎扎跳，仲有三幾哩，頂埋啦! 終於，捱返到終點。除咗對白飯魚，唉，起初的棉花膠紙都無乜用，亞霍的腳趾都係逃不過俾白飯魚啜到起咗幾個水泡。不過，聊以安慰係能夠完成咗第一個跑步賽事，仲係半馬嚟添喎，都算叻仔啩!

個零禮拜後，收到大會寄給各參賽者的油墨印的成績單，共有292人起步，261人完成。亞霍以1:39:04的時間，列男子公開組第63位；按時間計，總名次是83名。數下，依然輸俾一個女子──伍麗珠──香港長跑界的奇葩! 她以1:36:50奪得女子組別第一名。

HKDRC 香港長跑會 Facebook 專頁
香港長跑會網頁

編按：香港長跑會的Facebook專頁，因管理員從缺而有大半年沒有更新了。

Fitz連結: https://fitz.hk/?p=107767

更多:
Fitz Facebook專頁
報名跑香港第一個公開的馬拉松
馬拉松的承諾
亞霍@Fitz.hk
Fitz Running 跑步