大陸「疫情緩解」,官方急不及待要全國人民回復正常生活,其中停賽已久嘅長跑賽事,各地各市都積極舉辦。有大陸媒體統計至今已公佈賽事,單單四月份嘅30日,就有30場比賽。

賽事固然多到撞晒期,而且賽事規模都唔細。其中「鄭開馬拉松」(鄭州跑到開封) 高達49,000人,無錫同徐州兩個賽事亦超過20,000人。就算係二級城市,例如江蘇鹽城、淮安,四川眉山,一個比賽閒閒地都過萬人。粗略計算,呢30場賽事,一共會招待30萬名參加者。

搜狐圖片  按圖放大

熟悉大陸政情嘅朋友都明白,呢啲比賽唔多唔少都係造勢為主,有無人參加,參加者有無質素呢一類問題,其實並唔係最重要。最緊要就係,當官方要營造一個「疫情過去,生活如常」嘅畫面,地方政府、民間機構,就要盡力配合。

同霧霾玩遊戲

大陸開始舉行大型賽事,作為運動愛好者應當值得高興,不過疫情發展不明,令人不禁產生疑問: 一場比賽幾萬人,防疫係咪真係可以做到滴水不漏呢?

疫情之外,大陸最近亦有霧霾問題,足以令馬拉寸賽事蒙上陰影。

《立場新聞》(3月15日):

「因內蒙古和中國西北地區的大風吹襲,北京今早 (14日) 遭受沙塵暴,被厚厚的啡色灰塵所籠罩,能見度相當差。中國氣象局周一上午發布黃色預警,稱沙塵暴已從內蒙古吹至北京附近的甘肅、山西和河北等省。」據稱,呢次霧霾係近10年來強度最強、範圍最廣。

咁嘅環境之下,就算大陸跑手餓咗成年無比賽參加,呢30萬個名額係咪真係可以填滿呢? 或者主辦大會其實一啲都唔介意,因為舉辦比賽只不過係一場政治任務。

資料: 搜狐立場新聞


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > [Fitz中國組] 4月份30場比賽30萬參加者 同霧霾沙塵暴玩遊戲?