[HNR 18區跑步路線] 港島東鰂魚涌—大浪灣 (21公里)

由

Team HNR

2017-08-29

Fitz > 運動 Sports > 跑步 Running > [HNR 18區跑步路線] 港島東鰂魚涌—大浪灣 (21公里)

路線：鰂魚涌市政大樓 > 大風坳 > 大潭水塘 > 土地灣 > 龍脊 > 大浪灣
行李寄存：鰂魚涌市政大樓 (6至7樓鰂魚涌體育館)

距離：21.9km
總上斜：790m
最高點：334米 (柏架山)

難易度：★★★★★ (5★為最難)
景觀度：★★★★★ (5★為最好)
影相位：大潭水塘，龍脊，大浪灣
補給點：沿途沒有任何補給，直至終點大浪灣士多

詳細路線

注意

上大風坳同埋土地灣上龍脊為上斜，坡度亦較高，建議量力而為，可選擇快行。另外，沿途沒有任何補給，建議可揹跑山背心或背囊，帶足夠乾糧和食水。
如果途中發現補給不足，或體力不支，可以喺7K大潭道位置或14K龍脊入口搭巴士，小巴或的士離開。
如果體力不支但又想上龍脊打個卡，亦可以上完龍脊沿路落番巴士站，事關入口上龍脊頂 (打爛埕頂山) 只係唔夠2K，但均為上坡，不妨考慮。

總結

想喺港島練長課又搵唔到地方? 不妨跑入山! 由鰂魚涌港鐵站到起點只需5-10分鐘，然後沿途為一條大車路，一直上到大風坳，惟獨呢條車路係長命斜，可因應自己能力行或跑。上到大風坳可轉左沿野豬徑 (約3k山路) 落大潭水塘；唔想跑山路可經車路直落一樣出到水塘，距離亦相約。出左大潭水塘靠左入山路，港島徑第6段，約1K就會出到馬路，小心過對面沿引水道7K就會出到土地灣，龍脊入口，然後一路為山路到達大浪灣終點。

大風坳開始，基本上都係沿住港島徑走，一直去到港島徑既終點—大浪灣。到大浪灣有士多補給，有沖身處，亦有巴士小巴出筲箕灣，沿途風景宜人，上落不大，山路不多，確實係港島區長課熱點!