連續玩左2年大嶼50，今年挑戰一下難度，改玩大嶼100 (5800米上落波幅) 不負所望，真心覺得「金」。
一早同隊友到達起點，準備好裝備後，等到晚上11:30出發。起步慢jog順利到達 CP1芝麻灣。去CP2途中發生意外，喺水霸位置意外跌倒，令右邊面、膊頭同膝頭撞親留血。隊友扶起後，清洗傷口後，改為慢行前進。(信心受到打擊，係唔係可以完成賽事?) 返到CP2芝麻灣，馬上補給準備出發CP3伯公坳。離開CP後先發覺自己無去救傷站包紮傷口!
凌晨時份到左伯公坳已經好大風好凍，著好外套後開始打第一個大佬 (鳳凰山)，上山路段毛毛雨加上超大風，吹到人到癲，不停向上行，終於到山頂，大會義工見到我面上血跡，第一時間幫忙清理傷口。真心多謝熱心幫忙，落山路段風都無滴，超焗成身濕晒.終於克服第一個大佬。
到左CP4昂坪，已經係早餐時間 (有熱粥食，抵讚)，同時太陽伯伯出來陪行餘下路程(曬死人咩)。由CP4去到CP6係整個比賽最舒服2個路段。
入到CP6大澳，可以大休，食下麵同整理一下裝備走埋餘下路段，多謝Sunny出現陪伴應付上昂平痴線路段。600米不停上完石級，再上木梯(棧道)，見到大會義工以為已經到左CP。少年我真的太年輕了！義工只係通知大家向左走多3公里就到CP7。
再次回到昂坪，今次變身CP7，多謝靚女義工再次幫忙清理傷口。補給後亦要同Sunny講byebye，多謝佢一撐，先無放棄。
走左3/4路程，開始前後都無晒比賽人，間中會遇見一兩位跑友。去到CP8伯公坳 (又返到來喇) 終於要面對第二個晚上來臨，食完粥後，又開始打最後一個大佬 (大東山)。去到呢個時間體能都用得七七八八，要用意志頂埋佢。到咗山頂要面對大霧同路濕問題，由於自己頭燈照得唔夠遠，見到前面有人，馬上死跟人地燈光行，變成一個小隊，唔知以為玩緊毅行者。大東山落山梯級超多，不停落……
到左CP9白芒，表示走多5公里就完成100公里旅程。呢段上山同落山都算得上輕鬆，回到終點，亦係25小時之前出發起點，完成喇，第一時間影衝線相。終於唔洗再行喇!
總結
長途賽出現變數非常多，天氣、當日身體狀況、比賽中途發生意外，都會影響自己表現。所以平時有足夠訓練真的好緊要同比賽時要抱有一個打不死心態去完成。最後多謝大會義工無私付出，幫助跑手完成賽事!
Fitz連結: https://fitz.hk/?p=115294
Fitz Facebook專頁
[Jay的跑步筆記] 如果再也進步不了，我還願意繼續跑嗎?
跟住舊患跑初馬
[囉嗦大叔] 酸溜溜的百哩賽
Fitz Running 跑步
肥仔慢腳一名,幾年前突然愛上跑步, 由10K 去 全馬.又會參加山賽, 目標不求快,志在無傷無痛順利完成
