武漢肺炎全球擴散，日本受到鑽石公主號郵輪所拖累，疫情嚴峻。早幾日，倫敦市長候選人Shaun Bailey仲踩多腳，話倫敦唔介意代替東京，舉辦今屆嘅奧運會。
東京市長小池百合子當然不甘示弱，話從未諗過東京會搞唔成。而上星期五 (2月21日) 奧組委亦大派定心丸話一切如常，奧運將如期舉行，”No Plan B”。早前世界衛生組織 (WHO) 亦通知國際奧委會，奧運無需要取消或更改地點。
資深委員爆料
自1978年開始已經係國際奧委會 (IOC) 委員嘅龐德 Dick Pound，接受美聯社訪問爆出驚人言論。龐德向媒體表示，奧委會因應武漢肺炎，討論過東京奧運會唔會如期舉行，而結論係如果疫情不受控制，東京奧運唯有取消，無得改期!
龐德 Dick Pound
龐德話，東京奧運7月24日開幕，距離而家只有幾個月時間，時間甚為傖促，唔夠時間更改舉辦地點。而9月開始，美國嘅 NFL 同 NBA，以及歐洲各國足球聯賽相繼開鑼，延期其實不可能。
----- 廣告 Ad -----
不過，龐德補充，國際奧委會到而家未有任何決定，預計佢哋會喺五月再次討論，亦即距離而家仲有3個月時間。
如果在疫症下舉行奧運，將會威脅11,000位奧運選手、4,400位殘奧選手，以至數以十萬計由全球四方八面進入日本嘅觀眾。
資料: The Telegraph
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。