世事難料。新年流流冇人會預料到肺炎襲港，仲要散播去全世界。依家個個 work from home (or hills)、攬炒潮繼續，想跑個步都提心吊膽，日日出街都要數口罩，好似以前撳F5搶比賽位咁 mon 住 po隨時兩盒thx (下刪一萬字)。但就好似出咗 CP 發覺隻腳唔掂都路都照行頂硬上，日子都係照過㗎。
就好似早前我地嘅 Gold Coast Green Race 一樣，用咗好多心血同時間，希望五湖四海嘅跑友一齊享受香港黃金海岸同掃管笏嘅風景。可惜事與願違，比賽加入咗攬炒行列，老細 Martin 仲好唔開心添。
本來諗好咗點退錢，但好在忽然有個諗法，叮一聲「攬炒咋嘛，自己跑咪得囉!」
如是者，Green Race 第一屆 Strava 大挑戰就誕生了。最應景係仲要每個參加者都送一個四層活性炭口罩。
----- 廣告 Ad -----
突然老細又有主意:「咁倒不如原定比賽嗰日一齊自私跑吖!」
公告一出，其實團隊嘅心情都好忐忑，唔知跑參賽者會唔會接受呢個攬炒安排。好開心見到 Facebook comment 都好正面。
總算鬆一口氣。
到原定比賽嗰日，雖然冇CP、冇拱門、冇義工，但係有五十 (係五十!) 個參加者一齊等起跑，仲有幸見到曾小強一家出席添!
開始時一刻:
----- 廣告 Ad -----
有咩開心得過，抗疫艱難時期，大家一齊跑一轉，吸收新鮮空氣呢! 無論以後日子有幾難行，我哋都會抱住跑山嘅決心，開朗心境堅忍面對。記得注意衛生，有健康就使乜加持口罩睇龍珠吖。但跑前跑後帶返口罩，着多件衫勤洗手，仲要記得帶返走自己個口罩。記住個山係大自然㗎。
