本老hike除咗露營外，仲會行山，甚至越野跑，所以對山鞋要求都比較高。知好多 camper 都係著普通波鞋就去 camp，因為都唔駛點行嘅 camp site 多。
但如果想去啲比較特別嘅地方，如: Eason 山打卡、喺鹹田灣無嘢好做行轉蚺蛇尖等，山鞋就幫到你了。
選擇山鞋先要睇自己咩用途先，因為行山鞋、越野跑鞋、澗鞋，已經係三類唔同嘅鞋。
----- 廣告 Ad -----
鞋要揀選
1. 高/低筒
喺外國買行山通常都係高筒設計
高筒保護性高啲，以防唔習慣孭袋下上落山唔平衡而抝柴風險，但又失去咗靈活性。低筒就反之然，自己衡量。
2. 鞋底防滑
一對山鞋咬地同防滑好緊要，通常都想搵一對抓地力強同時又防跣嘅鞋，咁就要留意三點: 膠底、坑紋、釘。
- 膠底: 常聽到嘅有 Vibram、Stealth、Premium Wet Traction Contagrip 等
- Vibram: V底，應該買過山鞋都會見過 or 試過佢。評價好壞參半，因為遇上濕地都有人話跣。其實v底只係一個牌子，其中v底入面嘅 megagrip 先係啜地。
- Stealth: Five ten 專用底，相信行開山嘅對 Five ten 依對「澗鞋」應該認識的。
Stealth 嘅鞋底好軟，同時行山時會受熱，令到鞋底好似溶溶地咁痴住個地下。 - Premium Wet Traction Contagrip
Salomon 專用底，由S-lab開始轉用，打算一洗就 salomon 跣到 hihi 嘅形象，同樣係軟身底，利用膠面啜地。
至於釘同坑紋就易記好多，釘厚而坑紋深又多方向，就咬實沙泥，如果釘太薄，踩落去易跌親，坑紋愈深，就愈適合凹凸不平的路。而釘越軟身，就越配合至上面嘅鞋底。
通常抓地力愈強的鞋底，就愈快磨蝕，較唔耐用。唔好俾啲 sales 呃到你 。
3. 防水
----- 廣告 Ad -----
有部分人揀鞋時仲會考慮到防水能力，例如有無 Gore-Tex 等。本老Hike經驗係，Gore-Tex 係行雪地先用得著，香港行山著防水鞋又焗腳，入咗水仲好難乾。世上應該未有一種物料係防水力好仲要透氣的，所以都係選擇透氣舒服好多。
試鞋
當揀完以上三點後，就可以試鞋。
試鞋最好著厚襪去，因為好多時行山都會著行山襪，另外鞋要買大一碼，因為行山對腳會因血腋循環而脹咗，同時又會因為落斜導致腳頭受到衝力，所以買大少少，俾啲空間自己。
鞋真係好個人，一定要自己試先知自己適合咩鞋，要對對鞋有信心。搵到一對啱自己嘅形號，一世都唔會轉。
Salomon SPEEDCROSS 5
利申: 本老hike 為 Salomon Speedcross fans……因為中資收購了，終於要轉會。
