話說香港9月嘅旅客，比去年同期下跌咗99.7%，即係話得返上年旅客人數嘅0.3%，總共9132人次。旅遊發展局為咗吸引更多海外人士嚟香港旅遊，拍咗條好勁好勁嘅短片: 8K畫質，仲有360度VR視角，真係齋睇片都可以身歷其境。
只要按實mouse或者click左上角嘅按扭，就可以轉換角度。
5個超離地鏡頭
2分鐘短片，靚就真係好靚，之但係有朋友就雞蛋挑骨頭，覺得短片某些內容相當脫離現實，甚至乎係超現實:
1. 單車徑無人跑步 / 放狗
短片有幾名車友喺單車徑奔馳，但唔見有人跑步或者放狗。
2. 海底唔見有膠袋
現實嘅香港海底會唔會一啲垃圾都無? 膠袋、鬼網呢?
----- 廣告 Ad -----
3. 夜空有繁星
香港呢幾年嘅夜空，有時畀北方吹來嘅霧霾影響能見度，而本地嘅光害令大家好難睇到繁星。短片嘅星星究竟點嚟呢? 會唔會獅子山嘅朋友射上天空嘅電筒光?
4. 瀑布水潭無大媽沖涼
有大媽好鍾意除晒衫落水潭沖涼，無理由短片嘅瀑布無大媽出沒。
5. 獅子山無警察
短片開始無耐，影一影獅子山。但係山頂唔見有警察駐守喎
相信大家都好明白，宣傳片梗係要執下呢啲，執下嗰啲，。之但係都唔好落得咁重味精，完全脫離現實。遊客嚟到，發現貨不對辦就唔係幾好啦。
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。