小學雞問題: 呢個涼亭喺邊一條山徑?
行山group周不時都會有人發起呢類「估圖遊戲」，咪以為好無聊，原來真係好有建樹。美國就多得一位好叻認位置嘅行山發燒友拔刀相助，成功救出一名迷路山客。
事發於 Angeles National Forest
Rene Compean 日前到 Angeles National Forest 行山，點知迷路缺水缺糧，絕望之下坐喺懸崖影低「最後一景」，並將相片發佈上網。朋友睇到大驚，立即報警求救。
不過，呢個時候Rene手機無訊號，警察唔知佢嘅位置，唔可以搵救援住。於是將呢張「最後貼圖」公開，向公眾查詢影相嘅確實位置。結果，山界奇人 Benjamin 一睇之下，竟然知道位置，仲將位置坐標提供畀警察，令救援人員可以成功救人。
----- 廣告 Ad -----
最後一帖
Benjamin 話，自己好鍾意行山，有個嗜好係上網睇行山相然後估地點，點知今次真係大派用場。而被救出嘅 Rene 身體無大礙，佢仲好多謝 Benjamin 呢個特別嗜好，令佢可以逃出生天。
被救後要面對刑責
但係，事情並未完結。原來疫情之下，Angeles National Forest 關閉，公眾不得進入。Rene 呢次驚動警察，自然斷到正，當場被警方起訴。若然成功定罪，Rene 面臨半年監禁及一萬美金罰款!
如果被罰錢坐監，Rene真係地獄黑仔王，行山迷路仲要受罰，慘慘!
#小學雞問題答案: 一睇地下嘅石板路，就估到係元荃古道啦。確實位置係蓮花山公立學校對出。
----- 廣告 Ad -----
資料: CBS
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。