東京奧運再爆出負面新聞，日本 NHK 報道，多名負責救援工作嘅義工，於開幕禮前3日收到大會辭退信，奧運無佢哋份。可惜嘅係，唔少義工十分熱情，佢哋多年來嘅準備工作白白浪費，相當無奈。
據報，呢次辭退嘅係「第一響應者」，主要負責運動場看台急救工作，遇有現場觀眾身體出現不適，即時進行心肺復甦術等急救，以及協助救援人員運送擔架等物資。不過，主辦機構於開幕前3日 (20日) 向呢批義工發出信件，話因為今屆奧運會不設現場觀眾，所以佢哋無工作可做，取消佢哋嘅義工職位，亦即係話今屆奧運唔會同佢哋有關係。
大會發出嘅辭退信
義工培訓資料
可惜嘅係，呢班義工大多數都充滿熱誠，多年前已花錢花時間去做準備。其中一名50歲嘅女性義工，為咗做好奧運義工工作，兩年幾前參加急救課程，仲特意同正職嘅僱主傾好，可以喺奧運期間放22日假。但係收到辭退通知後，佢覺得自己嘅努力付諸東流，連奧運制服都拎唔到。而嗰22日假，佢亦無心情去安排節目。
https://twitter.com/QHTRHVvuvoZ7JaH/status/1417403779817742337
資料: NHK
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。