奧運獎牌得主，返到家鄉往往衣錦榮歸，地方官員爭相搵佢哋打卡，不過日本名古屋市長川村隆，就一時口多多，激嬲佢哋嘅金牌選手。
早兩日壘球投手後藤美宇由東京返到家鄉名古屋，由市長川村隆接見。後藤當然著晒制服，帶埋喺東京奧運拎到嘅金牌，盛裝出席。
鏡頭面前，市長川村隆表現佢親民同輕鬆嘅一面。佢對於後藤嘅金牌相當有興趣，拎上手把玩之餘，竟然一口咬落去! 片段所見，後藤睇到眼都突埋，但相信因為對方係市長，敢怒不敢言。
片段亦激發網民聲討市長川村隆:
柔道金牌選手: 隔住個mon都覺得肉痛
日本柔道金牌選手高藤直壽 twitter 發文:「我隔住個mon都聽到市長咬獎牌嘅聲音! 我自己小心翼翼咁保存獎牌，市長咁做太過唔重視運動員，真係喊出嚟!」
----- 廣告 Ad -----
此外，有網民指市長除低口罩放嘢入口，簡直係播毒，無視日本疫情嚴重。
結果，有 Twitter 網民更發起「請尊重運動員」嘅 hashtag，亦有人發電郵去市長辦公室投訴，一共有超過4000電郵，逼爆市長 inbox。
至於東京奧運最大贊助商豐田車廠，亦於社交媒體發文，大斥市長做法不當:「無對這位運動員產生欽佩和尊重，而他亦未將感染預防考慮在內，實在令人遺憾。」
最後，川村隆市民受多方面壓力之後，向公眾道歉。
----- 廣告 Ad -----
其實，東奧大會已多次重申，今屆獎牌以棄置電路板嘅金屬循環製造，可能含有毒物，想咬住獎牌影相，都係作下狀好。
資料: 聯合新聞網
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。