香港秘密搜查官．視標本為寶物的大學教授

導演 Mike 用吸管採集螞蟻

ViuTv 節目《香港秘密搜查官》，其中一集以「螞蟻搜查」為主題，介紹一班研究香港生態嘅學者。當中令大家了解到，就算螞蟻呢啲小生物，對生態系統亦有不能忽視嘅地位。而協助呢次拍攝嘅，就係香港生物多樣性博物館嘅成員。

Benoit Guénard 博士 (右)

大學教授自發管理標本

喺節目出現過嘅 Benoit Guénard 博士，2014年到香港大學擔任助理教授，而香港生物多樣性博物館亦同佢有極有關係。

香港大學有過百年歷史，好多學科都需要收集動物標本作研究或教學之用。久而久之，大學收集返嚟嘅標本越積越多，加上大學各個學院進行過多搬遷或擴建，標本被分散至大學不同地方，亦無得到適當保存，大多數長期封塵。

Benoit Guénard 博士到港大任教後，發現呢個問題，就自發整理呢啲藏品。佢集合其他幾位自願參與嘅教授同有心人，將咁多年大學收藏嘅標本集中擺放，最後仲得到多方面資助，成立咗呢個博物館。

而家博物館估計有超過10,000個標本，最早嘅標本遠至1920年代採集。除咗展示標本，博物館亦希望擴展現有嘅生物標本庫，以了解本地及區域生物多樣性情況。

螞蟻調查官

觀眾睇到節目嘅「搜查官」用吸管捕捉螞蟻，其實市民亦可參與其中。博物館最近推行「公民科學家」，招募螞蟻小哨兵。佢哋會向參加者派發吸管，市民可以用於協助採集螞蟻，令研究人員了解外來螞蟻物種喺香港嘅情況。大家可以去以下 Facebook專頁，留意最新招募消息。

香港生物多樣性博物館雖然有商業同政府資助，但資源仍然有限，需要市民擔任義工及捐款。亦因為人手有限，博物館不設walk-in參觀，大家需要網上登記預約到訪。

香港生物多樣性博物館網頁