圖: 香港足球總會
港台6月好波送不停，一齊撐港隊最盡興! 猶記得4月傑志出戰亞冠盃分組賽，全城關注，最終傑志喺香港市民遙距集氣之下，歷史性晉身十六強，連主教練朱志光亦特別致謝，令球隊遠在他方都能懷著「香港精神」作戰。
獨家直播港隊賽事
香港足球代表隊喺6月再度出戰不同賽事，港台電視32亦會送上一系列獨家直播! 首先係6月1日晚上8時45分，馬來西亞對香港嘅國際足球友誼賽，今場係香港新帥安達臣上任後第一次嘅公開正式賽事，主張逼搶戰術嘅佢，選入首名巴裔大港腳簡嘉亨、入籍兵費蘭度、謝家強等新面孔，配合原有富經驗、活力嘅球員，如喺亞冠盃分組賽表現突出嘅羅梓駿、安永佳，再加上今次馬來西亞代表隊由前港隊主教練金判坤領軍，令今場友誼賽話題十足。
緊接三場亞洲盃2023外圍賽，港台電視32亦會足本送上香港代表隊既所有賽事，分別係6月8日晚上7時15分對阿富汗、6月11日晚上7時15分對柬埔寨、6月14日晚上10時45分對印度。港隊上次出現喺亞洲盃決賽周，已經係1968年，香港隊只要把握呢三場機會，就可以一騷半世紀之癢，各位球迷一定要準時收看支持!
----- 廣告 Ad -----
圖: 香港足球總會
撐香港球會
撐完香港隊，港台陪你撐埋香港球會! 今年香港有兩支代表出戰亞洲足協盃2022分組賽，分別係理文同東方龍獅。理文上屆亞協盃躋身跨區決賽，距離總決賽一步之遙。今屆經驗、默契有所提升之下，期望佢哋可以突破上屆佳績，不過都要先過坐擁不少香港隊成員嘅東方龍獅一關。而小組第三支球隊台南市FC亦不容忽視，因為佢哋之前都有參賽經驗，今次更邀請曾經帶領香港奪得省港盃嘅郭嘉諾擔任特聘教練。香港球會鬥香港教練，份外有睇頭! 亞協盃賽程如下: 理文對東方龍獅 (6月24日)、台南市FC對理文 (6月27日)、東方龍獅對台南市FC (6月30日)。
值得一提，傑志喺八月中亞冠盃對泰國球會巴吞聯嘅16強賽事，據知亦「好有機會」再次喺港台電視免費送上，屆時球迷可以延續六月嘅熱情!
圖: 香港足球總會
專業評述陣容
有好波睇，都要有好波聽! 6月1日評述陣容打頭陣先有擅於營造氣氛嘅「阿占」鄺家銘、比賽經驗豐富嘅名宿「細鬼」張志德、資料準備充足嘅劉舜文，氣氛、戰術、資料都有，全方位照顧你嘅需要! 之後仲有更多重量級評述，大家要拭目以待。港台由上年十月開始直播香港超級青年聯賽，成功令大家更關注一班年輕小將嘅表現，喺接下來嘅直播，港台仲會邀請年青球員一齊入廠，為一班大師兄打氣之餘，更希望鼓勵佢哋假以時日可以披上大港腳戰衣。
體育能凝聚人心，特別喺疫情嚴峻之下，健兒獲取佳績可以為社會注入正能量。我作為超青主持及旁述，由超青直播至今，喜見港台一直十分有心推動本地足球，始終喺免費電視配合流動應用程式播放賽事，可以方便更多球迷收睇以及吸納「生客」，球員感受到關注，自然表現得更賣力。相信今次香港足球員喺各位市民齊心支持下一定會連創佳績，記得mark實時間準時收睇賽事直播！
撰文:《香港超級青年聯賽》主持及旁述馮子謙
----- 廣告 Ad -----
