PUMA 近兩年重新進入跑者嘅眼球，先有 Molly Seidel 穿著於奥運全馬攞到第三，近日又有本地跑手 Vincent 係半馬比賽勝出，可見佢哋推出嘅跑鞋已經好有競爭力。PUMA 以 Nitro Foam 氮氣中底技術推出左一系列跑鞋：有練習用嘅 Velocity NITRO 2，或者競賽用嘅 Deviate NITRO ELITE，但係我今次介紹嘅係用同一個中底技術推出嘅越野跑鞋 Fast-Trac Nitro。
第一對用同樣中底技術出品 trail running 鞋款其實係 2021 推出嘅 Voyage Nitro，但今次 Fast-Trac Nitro 明顯係要話俾大家佢係攞嚟跑，因為係外觀，反應同重量上都做得幾出色。
----- 廣告 Ad -----
Fast-Trac Nitro 有以下幾點值得留意:
- 鞋身採用 Ripstop 網眼鞋面，會較輕身，鞋舌同鞋領都夠厚同貼腳，跑起上嚟冇咁易甩踭。鞋頭有防護橡膠塗層，踢到石仔冇咁痛；鞋踭仲有橡筋方便著鞋。
- 中底係全掌 Nitro Foam，輕得嚟唔會影響反應又提供足夠緩衝。外面就用 ProFoam Lite 包裹保護，提供輕量同舒適腳感，同時保護番腳掌又避震。
- 外底用左 PumaGrip ATR 呢種耐磨橡膠合成物料製造，專為山路同不同地形而設，可以話係一個全能型設計，廠方增加顆粒數量同時縮短間距，用密集排列增加同地面接觸面積，提升防跣效果。
襯住好天，簡單走一轉 16K 大嶼山，有山路平路，順便睇埋芒草。首先著上之後感覺好輕，資料顯示佢只係 205g 左右 (US9)，前後掌差係 8mm，同路跑鞋差唔多。基本上對一般路跑人黎講會跑得幾爽，而係 Light trail 嘅路段上面更加感受到 Nitro Foam 嘅反應同緩震， 加上對鞋包腳，配合 PumaGrip ATR 嘅出色抓地力，即使踩中碎石，只要即時修正就唔怕會拗到。
總結：以我一個業餘路跑人學跑山嚟講，Fast-Trac Nitro 比較適合中短途 (30K或以下)、山路平路結合嘅越野跑比賽穿著，因為佢輕巧靈敏，對追求敏捷度嘅經驗跑者，只要加上佢哋嘅越野跑技術，絕對有助爭取理想成績。
作者: Jimmy Leung
廢跑 J
廢柴跑者，不學無術，運氣已在抽中 2019 年倫馬後耗盡，空餘時間希望可以支持香港運動員出一分力，畀更多人認識佢哋嘅努力