筆者已經超過 7-8 年冇試過 Mizuno，但過去一年，見到品牌嘅改變及進步，首先推出 HYPERWARP 競賽系列，亦有設立 Running Team，睇到品牌再次要讓大眾知道 Mizuno 係專業跑步品牌。今次筆者係收到一對全新 Super Trainer – Neo Vista 3，係 Mizuno 嘅 Max Cushsoning 款式，延續左上年推出嘅 Neo Vista 2，繼續以其厚底及緩震為賣點。短短半年各品牌已經分別推出左 Super Trainer，冇板訓練鞋開始成為呢 2 年嘅主流練習鞋款。
Neo Vista 3 結構賣點
鞋款定位為 Super Trainer，自然以回彈同推動為主。鞋底厚至 44.5mm (drop 為 8mm)，單腳重量為 265g (27cm/US9)。中底物料係兩層設計，上層 ENERZY NXT (TPU) 注入氮氣加強回彈及能量回饋，下層 ENERZY NXT 普通 EVA 版本，提供穩定性。中間亦加入左一塊 3D 全掌玻璃纖維尼龍板 – MIZUNO WAVE 波浪片增加鞋嘅穩定性同埋提供柔和嘅推進感。中底結構加入了 Mizuno 標誌性嘅 Smooth Speed Assist 技術，係落地時會引導腳掌向前滾動、彈起，讓步態轉換變得流暢。鞋底落腳位置有加上橡膠，前掌位置加深鞋底坑紋，提升抓地力同耐用性。
一體式針織鞋面，鞋舌與鞋身相連，有助減少鞋面因跑步動作滑移。Mizuno 重新設計嘅 Heel Construction，除咗係腳踭內部加入 padding，鞋帶孔頂端亦係較低位置加上較高領口，包覆感加強，變得十分扎實，提速時唔會有「甩踭」情況。腳跟及鞋舌位置加入拉環，方便穿脫。鞋面透氣孔清晰可見，方便透氣；但係香港潮濕天氣下，若滲入汗水或遇上下雨，針織鞋面或會變得更重。
上一代有用家反映不是 True to size 但筆者係今代並沒有問題，整體感受係舒適；重量只有 265g (US9/27cm) 算係輕。鞋身感覺偏大加上鞋底寬，若體重較輕嘅跑手或會感覺有點重。
跑後感
未感受過前代，但筆者分別係運動場，跑馬地及跑步機上試用過，總計超過 80km，分別體驗過 3 種課表 interval、Tempo 及 Long Run ，pace 大約 4:15/km -5:30/km。試著初期筆者在 M pace 或 Tempo 練習上已充分感受其回彈感，能夠係不大辛苦下完成訓練。另在長課跑了約 60 分鐘時，襪套因為筆者腳掌變脹，令到腳背有點不適，未知係咪新鞋太緊，鞋面未完全磨合所致，大家或要留意 (註：筆者左腳有高足弓，腳背經常感到不舒服)。筆者認為如果半馬拉松有能力以 1:40-1:50 之間完成，Neo Vista 3 亦可考慮作比賽鞋使用。腳踭厚度高達 44.5mm，重心過高，太複雜嘅路面著用時或要小心一點，以免拗柴，但跑者可以放心係一般柏油路或水泥地放飛，尤其筆者跑馬地練習時感覺確實爽快。如要係運動場練習，則要小心其穩定性，跑者或需要提高腳踝穩定性。
總結
Neo Vista 早於 1 代已開始向住 Super Trainer 方向設計，如今去到第三代，不停改進，再一次提醒香港市場 Mizuno 依然繼續保持競爭力，推出大眾期望嘅款式，正如 Neo Vista 3，跟市場上大多數 Super Trainer 類似，以雙層中底物料為結構嘅打造跑鞋，設計上雙層中底可以提供回彈推進，同時亦可以保持穩定同提高耐用度，產品功能及定位媲美其他 Super Trainer：asics Superblast 3、On Cloudmonster 3 Hyper，Hoka Skyward X 2 或 Puma Deviate Nitro 4 等等；可見 2026，Super Trainer 依然係市場主打跑鞋。
定價：$1,290
尺寸：True to Size
