星期六屏南石澗實況，睇到啲水已經變成泥黃色。 (香港01圖片)
早兩日朝早陽光普照，下晝傾盆大雨。屏南石澗有十幾位山友被困，仲傳出有人被大水沖走。好彩，最後只係虛驚一場。
事後，一眾山友梗係圍埋一齊傾下行山澗嘅心得。有人一錘定音咁講：
「行山澗危險過行山10倍！第一大守則，就係雙手唔好拎嘢！」
----- 廣告 Ad -----
呢位山友話，因為山澗地濕，又經常要攀爬，所以留空雙手，絕對百利而無一害。而亦係因為咁，行澗有別於普通行山，最好唔好拎行山杖。
行山澗要手腳並用，雙手千祈唔好拎嘢。(驚逝圖片)
呢個講法，絕對得到大家認同。之後，大家又一人一句講下自己嘅安全守則。總括嚟講，行澗要注意嘅地方就係：
- 留空雙手，方便攀爬
- 唔好拎行山杖，並注意攜帶裝備，例如應否帶頭盔、繩索等
- 山澗鞋以防跣、抓地能力為首要之選
- 千祈唔好一個人行，要有經驗人士帶領
- 電話用防水袋袋好，以免整濕
- 注意天氣：有雨一定唔好行；早兩日落過大雨都唔好行；行嘅時候無雨，但仍要留意有無落大雨嘅可能，以及留意上游嘅天氣情況
- 有疑問就唔好去，呢個世界無嘢需要搵命搏
最後，我山雞亦唔怕長氣，放多次呢條短片畀大家，畀大家知山洪有幾恐佈。留意短片1分鐘後會嚇親人，慎入。
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。
