理論上，行山唔使學，識得行識得上落樓梯就得，不過呢個始終係戶外活動，所女有一定風險，好多事都應該注意下。
以下係10個行山新手一定要識嘅名詞，唔好以為簡單就唔使理：
1. 路線
最初行山，對於香港郊野無乜概念嘅話，不妨先行下屋企附近嘅山徑。萬一蕩失路，都可以憑住你對社區嘅認識，搵到返屋企嘅方向。 (參考《[既方便又快捷] 11條藏於民居的行山徑》)
2. 隊友
無論新手老手，行山都唔應該單獨行事。起行前call埋老友啦，咪咁獨家村啦。而你亦要依據隊友嘅能力同喜好，再製訂不同路線。
3. 天氣
天氣當然會不似預期，所以更加要留意。熱天要帶多啲水，天冷帶多件衫，落大雨、行雷就要取消行程。唔同天氣就有唔同準備。
----- 廣告 Ad -----
4. 地圖
要大家識睇地圖，用針南指測量位置，似乎有啲不切實際。不過，就算係有人帶隊，起行前不妨開個Google Map (最好梗係睇郊遊地圖)，記低要經過嘅地方同路線。唔好彩脫隊，呢啲記憶話唔定可以幫到你。
地政署編製嘅郊遊地圖，唔算係最詳細，但對一般行山友絕對夠用。
5. 打卡/報到
打卡唔係為咗呃like，而係畀親友知道你嘅進度。注意嘅係，起行前亦要講畀屋企人知你嘅路線同埋預算結朿時間。
漁護處等機構，有行山專用app，可以幫你記低你嘅位置。 (參考《[大霧行山] SMS打卡出事搵到你》)
6. 裝備
行山鞋、背囊、毛巾、水壼…… 點樣揀有好多學問。最高原則係：輕便、輕便、輕便！(參考《[戶外活動超輕量化] 有佢一定掂》)
7. 食水
基本上每10公里要帶1公升飲用水，視乎天氣而定。最高原則係：有多無少。(參考《水多人不怪? 行山帶水有學問》)
----- 廣告 Ad -----
8. 食物
無論行幾耐，之前食到幾飽，都基本都要帶啲簡單而飽肚食物。可以係麵包蛋糕，可以係能量棒，總之夠輕夠飽肚就得。
9. 服飾
以輕便、透氣為佳。總之，唔好著牛仔褲，唔好著牛仔褲，唔好著牛仔褲 (重要嘅事要講三次)。而視乎路線，睇下需唔需要著長褲。另外，亦不妨帶備薄身風褸，就算山上唔凍，你搭地鐵返屋企都要著 (除咗驚冷氣凍親，仲驚你啲汗臭親人。)
10. 禮儀
山野雖大，不過如果亂咁嚟都會影響到人。例如唔好食煙、喧嘩、阻路…… (參考《10大令人討厭的行山行為》)
講返轉頭，上面嘅事情雖然重要，不過最重要仍然係行山嘅心態。一句到尾，切記冒進、性急，咁自然可以享愛郊野樂趣。
更多：
Fitz.hk Facebook專頁
10大令人討厭的行山行為
[大霧行山] SMS打卡出事搵到你
[北潭涌有巨蟒] 4招應付被蛇咬
Fitz Hiking 行山
