上次講完1-5條路線，今次繼續講第6-10。
新藏公路葉城段，因仲喺新疆境內，仲可以見少少人。
6. 喀什——拉薩（2850公里，30至40日）
路線：喀什市→葉城縣→普薩村→依格孜亞→康西瓦→甜水海→假桑瑪日村→吉普村→日土縣→噶爾縣→巴噶鄉→仲巴縣→薩噶縣→拉孜縣→日喀則市→拉薩市
特點：此為著名新藏線，出晒名偏僻偏僻又偏僻。原因係，呢度除咗係中國邊境省份，仲係全中國最高海拔嘅公路，平均海拔達4500公尺，途中要穿越5000公尺嘅高山達5座。當中仲有一片區域內地稱之為「無人區」，即係人影都唔多個。莫講話搵人整單車，搵人煮餐飯畀你食，搵個瓦遮頭瞓覺都唔易。仲有呀，呢段路要申請邊防證先去得。
點評：上面講晒，無乜補充，路線太艱難，難以想像。我只係睇過一啲揸四個碌嘅遊記，就算有幾部車照應，最後都要搞到喺路邊截軍車求救（段路其實只有軍車行走）。
----- 廣告 Ad -----
踩車遊新藏嘅短片：
7. 環海南島（650公里，8至10日）
路線：海口市→靈山鎮→三江鎮→文昌市→東郊鎮椰林風景區→博鰲鎮→興隆熱帶植物園→三亞市→五指山市→瓊中黎族苗族自治縣→海口市。
特點：內地北方人最熱門旅遊區，海灘、椰林、海景……總之一片熱帶風情。而這段路路況良好，基本為平路。
點評：根據近年所讀過嘅新聞以及遊記，海南為宰客最狼死嘅地方，旅客就似一隻隻肥羊等畀人劏。況且海南所謂嘅熱帶風情只係內地人講法，莫講話馬爾代夫，就算同布吉比，難免有陣A貨味。
海南風情，問你怕未？
----- 廣告 Ad -----
8. 上海——烏魯木齊（3900公里，40至50日）
路線：上海市→無錫市→南京市→合肥市→信陽市→南陽市→西安市→平涼市→蘭州市→武威市→酒泉市→嘉峪關市→柳園鎮→猩猩峽鎮→駱駝圈鎮→哈密市→吐魯番市→烏魯木齊
特點：要經過八個省市，由沿海城市，經沙塵滾滾嘅黃金高原，再去到西北沙漠。風景唔算特出，但勝在可以了解到內地唔同地方嘅風情。
點評：路線有啲夾硬搞到咁長，其實分三四次都得。
香格里拉沙松碧村
9. 環香格里拉（1500公里，20至30日）
路線：成都市→都江堰市→小金縣→丹巴縣→新都橋鎮→理塘縣→稻城縣→鄉城縣→香格里拉縣→麗江市→瀘沽湖鎮→鹽源縣→西昌市→雅安市→成都市
特點：路線經過四川、雲南兩省最有特色的地區。有靚景、有少數民族風情，甚至連冰川都有。不過不少路段要上高山（理塘超過4000公尺，為世界海拔最高縣城。）
點評：好想去，講完。
10. 成都——拉薩（2200公里，25至35日）
路線：成都市→雅安市→康定縣→雅江縣→理塘縣→巴塘縣→芒康縣→左貢縣→八宿縣→波密縣→林芝地區八一鎮→工布江達縣→墨竹工卡縣→達孜縣→拉薩市
特點：一句講晒，上上落落上上落落上上落落。由四川盆地（成都，500公尺）去川西高原（理塘，4000公尺），入西藏南部（約2800公尺）再進入拉薩（3650公尺）。
點評：據我哋Blogger FreeWider所講，近年呢段每日有成千人踩車進入，認真熱鬧。但川藏公路出名多泥石流意外，夏天出行要小心。
----- 廣告 Ad -----
川藏公路著名七十二拐。
編按: 點評由家聯撰寫，他是電台節目《串》前監製，曾走遍神州大地，熟知中國天下事。
資料來源：今日新聞網
更多：
返強國踩車-10條路線任挑戰（上）
從香港騎單車到印度–啟程
Fitz單車文章
