[全馬初體驗] 全馬同100km 邊樣辛苦D?

終於跑左人生第一隻全馬，好多朋友都唔信，我之前堅只係跑過「十K馬拉松」。其實一直自已都鍾意玩山賽多D，路跑就一直玩10K多，因為快靚正，衝時間!上年10K有幸衝到Sub 40，自已對路跑既目標已經達成。而玩全馬，開頭都只係諗著一世人點樣都要跑一次全馬，所以就報名!

跑完之後，女友問我跑全馬同100km邊樣辛苦D? 未跑之前，照睇里數玩100 km vs 42 km 好似玩全馬會輕鬆D ; 需時方面，玩100km閒閒地十幾廿個鐘，全馬只係3，4，5個鐘。點睇都係全馬輕鬆D啦。但自己跑完之後就發覺唔係個回事，以下對比下我對兩個個人賽既感受。

• 賽事: 全馬 vs 100km (HK100)
• 需時(小時): 3:2x vs 15:2x
• 當日天氣: 13-19度 (排除了天氣影響，2個比賽天氣都一流，都屬於PB嘅天氣)

以下既辛苦程度對比*(純粹個人感覺):

1. 賽前訓練
100km – 辛苦D
純粹以時間同里數比較，當然某程度上只係因為自主力操山關係，當時操100 km 每星期六閒閒地都操一次40K 以上長課，起碼要玩8-10個鐘，Gear/補給亦要較多，感覺上負重及付出一整日的時間，感覺較辛苦。而平時練路跑，都主要是周中操Interval/Tempo，大約1-2小時，主要是針對速度練習*(係自己衰太懶，少練長課)。

2. 賽前準備
全馬– 辛苦(難)D
純粹以試路比較*(因為準備功夫都唔太相同，難以比較)。渣馬基本上無得試路，除左比賽你根本無可能可以試跑昂船洲大橋，汀九橋或者跑西隧。對於初馬友來講，真係跑到去先知乜野事，幾時要留力上斜，邊到有落斜位可以俾你追時間，真係有D難預計。反而山賽就可以有得賽前試路，有心理準備係差好遠。

圖: 平時邊有馬路/天橋俾你練 Photo Credit: Jenny

3. 起步時間
全馬 – 辛苦D
以起步時間比較，一般山賽起步時間多數係早上8-9點，但馬拉松就6-7點起步，對於我呢D懶訓人真係一個挑戰。

4. 比賽過程
全馬 – 辛苦D
如果以我要做到自己既目標來講*(全馬sub 330 , 100k sub 16hrs)，基本上全馬唔可以行要起碼keep到5分pace，而100km就要keep 著jog, CP 唔可以hea，同埋頂眼訓。其實兩者都好辛苦，但非要我選擇的話。我就覺得全馬辛苦D，因為全馬比起100k山真係比較 Chur ~ 因為要Keep著跑無得停，反而山賽你都有上鈄比你回下氣，或者慢行幾十秒休息下都唔會輸好多時間。但全馬可謂分秒必爭，你慢10秒，要追番嘅話付出既體力可能更多。

圖: 山賽起伏較多，比較多位可以俾你回下氣/補給下 Photo Credit: Lucien Chan

5. 完成後感覺
疲勞度 ~ 平手
2個比賽跑完都一樣咁攰，我感覺唔到個分別，都係大脾硬晒，跑完後吹兩野風，個人虛晒 ~ 哈!

圖: 今年Nike D宣傳推廣真係搞得唔錯，讚! Photo Credit: Jenny

----- 廣告 Ad -----

總結，對我個人而言 ~ 好似玩全馬攰D。當然唔可以一概而論，其實兩個運動都各有樂趣，如果未跑過全馬嘅話，可以試下挑戰下自己。而玩開路跑既朋友，亦不妨試下玩山賽，山上風景有時真係非石屎森林或運動場可比，而有路跑底子既朋友，心肺會比較強，玩山賽係會有速度上嘅優勢。