Fitz > 裝備 Gear > 小品牌、大夢想 | 淺談三個冷門跑步裝備品牌

除了大品牌外,唔少品牌係近2-3年嘅香港路跑市場掘起,好似 ON、Hoka、Saucony 等,但係大部分都係生產鞋為主導,個別品牌如 Tracksmith 一早就通過網路進軍香港,日本自然有更多例如 MMA、ELDORESO、Stamp 等。今次筆者先㨂咗幾個衣服品牌同大家分享下,世界仲有好多,大家可以發掘更多分享。

輕薄速乾英國貨 SOAR Running

圖片來源:SOAR 官網

英國品牌,2015年出世,創辦人 Tim Soar 自己都係一位設計師同跑手。 背心重量只有44g (M),再加上100%回收物料生產,配合現時以環保為核心嘅大趨勢發展,品牌短時間已經成功進入英國跑者眼球,亦係今年4月倫敦馬拉松設立 pop up 等跑手感受一下 SOAR 文化。

品牌係2021年左右由代理引入香港,1-2 年通過曝光,火速成為跑衫新貴。好多人一開始見到價錢就放低,但更多用家係入手後,對其輕薄同埋速乾功能性非常讚嘆,更大讚係 vest 界天花板,相信唔少路跑及山賽都見其踪影。近期亦推出香港特別版,特意找來 Sammy So、Lok、Peipei 同青山之王做 ambassador 介紹;無獨有偶,幾位都喜歡越野跑,Lok 同 Peipei 仲啱啱係 TransLantau 攞到優異成績,但篇幅有限,呢度唔詳述背心嘅優點。

筆者都啱啱入手一件

筆者反而留意短褲設計嘅特點,大部份路跑短褲都冇特別為袋 gel 設計,一來 race shorts 以輕為主導,二來高手唔使袋咁多 gel 係身,所以對於袋嘅使用未必有太多考慮。好多人就係咁而選擇著越野跑短褲長跑, Soar Running 就好貼心係短褲前端加上橡筋圈,等跑者可以輕易攞 gel,另外褲後面大袋亦係橡筋作開口,係一個好細心嘅設計,唔會擔心跑緊跌左同時又可以輕易抽出。

設計簡約丹麥產品 SAYSKY

丹麥品牌,2013 年面世,SAYSKY 係由 “Look up in the sky and be a star” 而嚟,品牌希望大家可以勇於挑戰自己,追逐夢想。北歐品牌特色就係 Minimal 設計,同時主張環保。由SS24起品牌將有超過75%產品會係用 Responsible Manner 生產,即係產品有40%以上用可回收、可再生、可生物降解同埋有機物料生產。

圖片可見,設計極簡潔係北歐特色 (大家鍾意 IKEA 嘅原因),加上當地四季天氣分明,所以會提供唔同 layer 及款式於秋冬季著用,手襪亦有多款選擇應付寒冬,相信香港人只集中留意背心短褲。

圖片來源: SAYSKY 官網

筆者曾於 2021 年渣打半馬穿上 Saysky 背心跑褲完成,感覺半馬非常適用,褲已有內膽,及後腰位置有兩邊袋,足夠放2包 gel 完成賽事。

圖片來源 IG@stepsportsosaka

品牌已經係日本進駐 SteP,相中3位正是大阪梅田店員,筆者11月初去購物都係由佢協助。

香港亦有 Harbour Runners 聯乘款式,圖片來源 IG@harbourrunners

支持環保來自美國 Janji

美國品牌,2012 年誕生,”Janji” 係印尼語,promise承諾咁解,但佢做咩承諾呢? 品牌希望通過跑步讓大眾可以接觸淨水,(又係環保公司),所以每張訂單2%收益都會用番嚟支持為品牌每個季度系列提供靈感嘅國家淨水項目。

Logo 就係一個地球嘅正弦地圖投影演變出嚟,象徵著世界係相互聯繫。

SS22 同印尼爪哇 Greeneration 合作,FW22 同智利 Fundación Amulén 至 SS23 同 GWP-C 合作為加勒比海國家出一分力,可見品牌用心為各地出力,網站以 collection 區分。

如 SS23 Carribean 風格偏向樹木,海洋色系。

FW22 智利則傾向 earth tone

跑步背心、短褲等用一款叫 AFO (AirFlatOut) 彈性物料生產,以快乾、排汗及回收布料為賣點。

SAYSKY 同 Janji 暫時香港未有代理引入,始終運動品牌競爭非常之大,即使專注瑜珈嘅 lululemon 都有開發跑步系列,希望大家除咗大品牌外,細品牌亦有好多可取之處,值得大家留意及支持。

SAYSKY: www.saysky.com
Janji: www.runjanji.com

>


文章為作者意見,不代表Fitz立場。
歡迎投稿: https://fitz.hk/contribute/