圖: 太古城中心網頁

好耐無行過太古城,最近一踏足,發現太古城中心地下,Adidas 隔離,開咗間 Asics 專門店。

見係新開張,入去行番轉。驟眼睇無乜特別,因為外觀、裝修,同其他 Asics 專門店完全無分別。

「咦,點解唔見我之前睇到嗰對跑山鞋? 」

同行朋友發現貨品嘅款式同銅鑼灣分店有異,搵唔到佢想買嗰對跑山鞋。莫非 Asics 啲越野鞋打贏所記、Hoka,賣到斷晒貨?

肥仔店員嘅答案,令到大家嚇一跳:「我哋呢間同銅鑼灣嗰啲舖唔同架! 佢哋嘅 Asic s專門店,由運X家管理,我哋太古城呢間係日本 Asics 自己做番!」


唔係啩,間舖個樣一樣喎!

「咁之前香港嗰啲專門店裝修同設計,都要跟足我哋日本總公司嘅要求吖嘛。」

店員話,太古城呢間舖,暫時係全香港唯一一間日本直營嘅專門店。同運X家管理嘅最大分別,係入嘅貨會好唔同。不過而因為佢哋啱啱喺11月尾開張,鞋款反而唔及有舊貨積存嘅運X家 Asics 店 (所以我朋友搵唔到對跑山鞋)。

如果細心睇,佢熱門款式 (如 Gel-Kayano) 嘅顏色又真係唔同出面見開嗰啲。而店員亦話,因為佢哋係日本直營,所以款式較新,亦會更為多元化,包括會引入唔同闊度嘅跑鞋。

喺度要強調,「全港唯一一間日本直營專門店」呢個講法,暫時只係呢位店員嘅片面之詞。我搵過官方網頁,分店資料仍然顯示共有8個分銷地點。至於係咪與別不同,唯有拭目以待啦。

Fitz連結: https://fitz.hk/?p=109139


更多:
Fitz Facebook專頁
[心率錶實測] 蒸餾水 毛公仔 利賓納「心跳」有幾快?
[山系併購] Salomon Suunto 染紅? 中國安踏擬收購芬蘭Amer Sports
Fitz Gear 裝備

廣告
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。