古語有云: 輸人唔輸陣。做咩運動都好,最緊要梗係裝備。裝備除咗令你更有型更有款外,仲可以保住你條命。美國有位單車友,就畀佢戴住嘅 Apple Watch 救番佢一命。

跌爆頭大難不死

美國華盛頓州嘅 Bob Burdett 一個喺州立公園踩單車,中途發生意外撞親個頭,即場昏迷。好彩,佢撞到嘅時候同時啟動 Apple Watch 嘅「跌倒偵測」(fall detection) 功能。手錶自動通知預設嘅緊急聯絡人,就係佢個囝囝 Gabe。

阿 Bob (右) 同佢囝囝 Gabe
阿Bob跌倒嘅州立公園

Gabe 飛車去公園,點知唔見佢阿爸嘅踪影。呢個時候,Gabe 又收到 Apple Watch 嘅通知。原來除咗發訊息通知緊急聯絡人,仲會直接報警,當阿 Bob被 送上救護車時,Apple Watch 又會將最新位置通知Gabe。

就係咁,阿 Bob 大難不死,及時獲得救援。唔少人都話呢幾千蚊港幣都值得畀……

Apple Watch 的跌倒偵測功能


Apple Watch Series 4 或之後型號都設有「跌倒偵測」功能,如果手錶偵測到有嚴重跌倒,會出震動訊號及警報音效,錶面並發出「你好像跌得很嚴重」訊息。

呢個時候,你無事嘅話可以關閉提示。不過,如果手錶喺一分鐘內偵測唔到你有任何動靜,就會立即致電求助,將位置傳送去緊急聯絡人,更可以同時幫手報警。

Apple Watch 通知聯絡人嘅同時,亦會發出提示響聲,如果唔關閉,響聲會越響越大,以求附近嘅人都聽得到。所以就算所處地方無網絡,都仍然有救援機會。

可於 Apple 手機更改設定

Android 難以取代

事實上,Apple 呢個「跌倒偵測」功能,其他平台及裝備品牌,暫時仍未可以追得上。Google Play 雖有唔少聲稱做到 fall detection 嘅 Apps,不過只要睇下啲評語,無論係咪免費,都會 feel 到陣伏味。(各位有好介紹請通知我)

至於 Android wear,亦暫時唔見有合適產品,所以真係有需要嘅話,三千幾蚊隻 Apple Watch (最平嗰款) 都算係值得。

Goolg Play打fall detection,搵到呢一堆。
外國論壇有專家話呢項功能仲係Apple贏晒

資料: AppleNewsypeopleReddit

Fitz連結: https://fitz.hk/?p=126287

其他文章:

廣告
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。