台灣嘅螢火蟲,真係超靚。
台灣嘅螢火蟲,真係超靚。

依據舊時曆法,新曆六月應該算係「初夏」,不過呢兩日日頭都有成34度,真係唔知咩季節。

BTW,總之呢段時間,係螢火蟲活動嘅季節。之前睇過有山友,就公開指責觀賞螢火蟲嘅朋友唔守規矩,大聲講嘢之餘,仲開晒電筒,搞到啲螢火蟲走夾唔唞。

其實觀賞任何野生動物都要顧及禮儀,以免影響他人,同傷害小動物。而因為螢火蟲係極為脆弱嘅生物 (青島有商人試過人工引入過萬隻螢火蟲,點知3日死剩一半!) 依照台灣嘅生態旅遊網站,觀賞螢火蟲就要注意以下呢幾項:

  1. 著長袖衫同長褲,避免蚊蟲叮咬
  2. 唔好著涼鞋,以免被蛇咬
  3. 盡量細聲講嘢,腳步放緩,唔好嚇親啲蟲蟲
  4. 大雨後,要小心地滑
  5. 太陽啱啱落山後,係螢火蟲活躍嘅時間,過咗夜晚九點,佢哋會開始少發光
  6. 千萬唔好捉佢哋(諗都唔好諗),佢哋一離開郊野,會好快死
  7. 用電筒照明時,盡量唔好用白光,請用紅光。如電筒無紅光功能,就加塊紅色玻璃紙。強光會影響螢火蟲活動,亦會影響其他遊人
大埔滘嘅螢火蟲。
大埔滘嘅螢火蟲。

至於香港有咩地方可以睇到螢火蟲呢?一般而言,佢哋聚居於山澗、山谷樹林內。不過,蝴蝶、螢火蟲呢啲昆蟲,由於遊客多少會直接影響佢哋嘅生活,所以保育人士通常唔會好詳細講清楚佢哋聚集嘅地點。

香港獨有的螢火蟲品種 : 米埔屈翅螢 (相片來源 : 香港昆蟲學會)
香港獨有的螢火蟲品種 : 米埔屈翅螢 (相片來源 : 香港昆蟲學會)

不過根據昔日傳媒嘅報導,以下呢幾處都應該可以睇到螢火蟲:

1. 大埔滘郊野公園 (山腳嘅荷花池)
2. 大帽山郊野公園 (施樂園附近之瀑布)
3. 米埔
4. 尖鼻嘴

香港其實有間「螢火蟲館」,大家可以去佢哋網站了解多啲。

資料來源:travel.network.com.tw

更多:
Fitz.hk Facebook專頁
[唔好做殺手] 摸蜆破壞海洋生態
蚊滋仔下晝3點前最危險
[唔行無得食] 8大隱世豆腐花
Fitz 生活 Life