5月中貨櫃輪仲係火光紅紅

新加坡註冊嘅貨櫃輪「MV X-Press 珍珠號」,5月15日於斯里蘭卡西部海港內貢博 (Negombo) 焚毁。當局救火超過兩星期,至5月31日外部火勢已經救熄,但貨輪內部仍然著火。

火勢並唔係今次對公眾最大嘅安全隱患,最大問題係貨輪上嘅貨物。「MV X-Press 珍珠號」主要運載化學原料,貨輪有數以百噸計嘅硝酸、潤滑劑、化妝品原料,以及相當數量嘅聚乙烯顆粒 (製作「塑膠袋」主要原料)。呢啲原料喺貨輪損毁之後隨海漂流,嚴重破壞自然生態,斯里蘭卡沿岸海灘,已鋪滿塑膠粒,而溶於大海之中嘅化學原料,更加難以目測。政府已下令關閉沿岸80公里海岸線,7000名漁民禁止捕魚。

斯里蘭卡屬全球最貧窮國家之一,當地人以捕魚為生,貨輪意外幾乎令當地經濟停擺。此外,當地缺乏大型清理機械,貨輪造成嘅海洋及海岸污染,只靠當地居民用手清理。

另一方面,5月開始斯里蘭卡受到印度傳來嘅病毒威脅,確診數字屢創新高。政府既要防疫,又要動員民眾清理污染物,根本難以招架。政府官員表示已無計可施,話:「呢次斯里蘭卡史上最嚴重嘅海洋污染事件。」

唔少人認為,貨輪公司要承擔責任,協助斯里蘭卡清理污染物,甚至援助當地經濟。不過貨輪公司仍然愛理不理,而貨輪註冊國新加坡,亦未對事件積極回應。

內貢博 (Negombo) 嘅漁村風情及其原始生態,吸引唔少遊客。

資料: CNA轉角國際 udn Global


文章為作者意見,不代表Fitz立場。
歡迎投稿: http://fitz.hk/contribute/
首頁 > 生活 Life > 化學貨櫃輪大火 釀斯里蘭卡生態大災難