[另類零食] 日本無印推出「蟋蟀脆餅」

日本無印良品推出「蟋蟀脆餅」(Cricket Crackers)，定價190日圓。無印網頁介紹呢款餅乾嘅時候，亦提醒大家，食用昆蟲將係未來大趨勢，以解決人口日多、糧食日少嘅難題。

人類進化咗幾萬年，昆蟲都唔係人類嘅主要營養來源。點解呢十幾年唔少人推廣食用昆蟲呢? 可以話，係基於以下呢幾個事實:

1. 人口急增: 2050年，估計全球人口達90億
2. 糧食減少: 人口增加、耕地減少、氣候變化等原因，令糧食產量減少
3. 貧富不均: 全球財富集中在少數人，某些國家或地區會出現糧食危機
4. 食用昆蟲飼養成本低: 相同蛋白質嘅昆蟲，飼料比牛少六倍，比綿羊少四倍，比豬和肉雞少兩倍。
5. 飼養昆蟲對環境破壞比其他牲畜更低

呢款「蟋蟀脆餅」於5月20日發售，如果反應熱烈，公司話稍後會於全球發售。其實，外國早幾年已開始流行使用蟋蟀製作能量棒，大家有無興趣試下?

資料: 無印良品