女仔著 bra top 行山成日畀人鬧爆 圖: 美女郊遊遊

大熱天時行山或跑步,唔少男女都以「少布先行」,男嘅索性除咗上衣,有啲女士會著 bra top。佢哋相信,除衫之後可令汗水直接揮發,令身體發出嘅熱能可以經汗水排走。

做運動可產生80%熱能

先了解點解做運動會身水身汗。運動科學顧問 Dr Samuel N Cheuvront,曾經為美國軍隊做過呢方面研究,佢話當人類進行體力活動時,消耗嘅能量只有20%用於進行運動,其餘80%變為熱能,身體亦因為呢啲熱能適當調節排出汗水,並會感到疲倦。

另一位學者,俄勒岡大學人類生理學教授 Chris Minson 話,身體需要散熱時,皮膚表面血管擴大,汗腺將汗水化成水蒸氣,然後在體外蒸發,以達致散熱功能。呢個時候如果身體唔立即將熱能透過汗水排出,就會影響運動表現,跑得更慢,更易力竭。

日頭除衫會更熱

唔著衫,或著少啲衫,增加皮膚暴露於空氣嘅面積,確實可以加速皮膚上嘅汗水蒸發,有助降溫。不過呢啲情況只係天陰或喺樹蔭之下先有用。Chris Minson 補充,太陽光線可產生充足熱能,而皮膚被太陽直接照射,會令身體吸收熱量。

所以,喺晴朗天氣下進行戶外活動,除去上衣其實無助降溫,反而令身體更熱,更大機會曬傷皮膚。

事實上,現今運動衣著物料十分先進,有優良嘅排汗功能,亦能夠防曬防 UV。所以,為咗保護皮膚免避曬傷,提高運動表現,以至維持良好市容,大家出街做運動都係著番件衫啦。

著番件衫咪好囉

資料: Men’s Journal

廣告
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。