我哋嘅特首公佈最新一份施政報告,有關體育政策共有一項,佢有咁嘅解釋:

為市民的健康着想,我們必須鼓勵他們多做運動,減低患病風險,否則運動量不足加上人口老化,可能會令長期病患者數目和醫療開支大幅增加。

呢個講法喺呢十幾廿年以來,都係西方醫療政策嘅基本哲學。滿以為佢有完善政策去鼓勵市民做運動,可惜呢個只係大家一廂情願嘅想法。施政報告有關體育發展方面,只有數個段落 (見《施政報告附篇》):

政府決定向60個體育總會嘅撥款,由每年約3億元逐步增加至超過5億元,用以推動體育普及發展、青少年培訓、社區參與、各級代表隊訓練及海外交流與比賽,並改善總會人手和員工待遇。即係話,拎5億出嚟送畀各個總會,其他嘅事叫市民自己搞掂。


咁多年來,呢啲體育總會又做過乜去將體育運動普及化? 市民又有幾時可以從呢啲總會入面得益? 以業餘田徑總會為例,每年佢哋所搞嘅比賽報名費比起其他比賽一啲都唔平,咁佢搞比賽係為咗推廣跑步文化,定係從中再賺一筆?

改善山徑設施

另一個被傳媒視為體育政策嘅措施,就係改善黃泥涌峽徑以及北潭涌嘅設施 (下圖第二及第三點):

黃泥涌峽徑係港島一個充滿古跡的山徑,而北潭涌係西貢行山遠足嘅集散地,政府打算改善呢兩個地方嘅設施似乎係一項德政。不過,睇真啲,發展呢兩個地方並唔係鼓勵市民行山,而係推廣旅遊! 而負責嘅係商務及經濟發展局,並唔係食物及衞生局轄下嘅漁護署呀!

黃泥涌峽徑嘅古跡
北潭涌係麥理浩徑起點

所以,特首話要鼓勵市民多做運動,去紓緩醫療壓力等等講法,只不過係一派空言。市民並唔需要一座超豪體育館,只係希望市區嘅單車徑、緩跑徑可以規劃得好啲,就腳啲; 市民亦唔需要喺無人嘅沙灘起座觀星台,只係希望山徑周圍可以有多幾部飲水機,山徑嘅復修可以繁密啲。

不過,政府只係識得派錢畀體育總會,真正受惠嘅市民又有幾人呢?

更新: 警方阻撓體育運動

完稿之後,收到田總公告,指「新鴻基地產香港十公里挑戰賽」因「接獲警方對比賽發出反對通知」,賽事可能取消。

警權無限大,而家連一個舉辦咗十幾年嘅賽事都話唔搞得,特首話要推廣體育運動嘅一番美言,又再自打咀巴! 不過警察做嘢,特首仲無能力去干涉呢?

行政長官2019年施政報告附篇

Fitz連結: https://fitz.hk/?p=126706

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告
永誠
講求綠色、環保、天然的健康生活。推廣新一代健康生活文化。