陳伯介紹 兩條「鳩行」Youtuber Channel,好睇就好睇,不過筆者嫌未夠「鳩」。講到「鳩行」,筆者首推 Cedric社職仔 嘅頻道。

「Cedric社職仔」由幾名14歲嘅小朋友主理,內容廣泛,有真人版喜劇、整蠱環節、開箱文,甚至魔術教學。而最廣為人知,係佢哋喺武漢肺炎停課期間,幾條「行路」短片。

天水圍行路去柴灣

「社職仔」響朶之作,係停課期間拍嘅「徒步由天水圍行路去柴灣」,點擊率有310,000次。

14個鐘行42公里,更要行山路,對呢幾位細路都算係大挑戰。不過,短片之中,令人感受到佢哋對世界嘅好奇,對前路充滿希望。而呢種感覺,我哋呢班大人真係好耐無感受過。

話佢哋「鳩行」,絕對唔係貶意。「鳩」者,漫無目的也,即係唔使講咩大道理,由心出發。正如「Cedric社職仔」自我介紹話:「總之係自己鍾意嘅咪得囉,每天做着自己鍾意嘅嘢,過得好一點,咁就最好啦」。

佢哋並唔會同你講路線規劃,又唔會介紹咩徒步裝備,可以話係為行而行,但令人睇得開心,更會為佢哋打氣。除咗天水圍行去柴灣,佢哋仲試過海怡半島行去上水、上水行去尖沙咀等。

呢班細路證明咗,正能量唔係掛喺口邊嘅廢話,落手落腳一樣得。

Cedric社職仔 YouTube 頻道


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。