[武漢肺炎] 英國盲搶糧 食物銀行勁缺貨

歐洲爆發武肺，英國難以置身事外。呢幾日，英國民眾都驚疫症會會影響貨運，擔心物資短缺，於是就似足香港前幾個禮拜，大批市民去超市搶購日用物以及糧食，超市貨架被清空，上至廁紙、清潔用品，下至罐頭乾糧米麵，全部買到斷貨。

另一方面，英國民間都有慈善救濟嘅傳統，民眾好樂意向弱勢群體捐助救援，當中嘅食物銀行發展蓬勃。唔少低下階層，都要倚賴食物銀行嘅救援，以得到充足嘅營養。

不過，因為武漢肺炎威脅令民眾「盲搶糧」，令唔少食物銀行物資短缺。有食物銀行因為捐助嘅糧食比平時少咗25%，需要用200英鎊 (約2000港幣) 購買食物。之但係，因為超市食物被清空，佢哋有錢都未必買到糧食。

食物銀行負責人話，佢哋出現物資短缺嘅原因，不外乎三個:

1. 疫情之下，民眾花心機去搶購物資，已經無心情去進行慈善活動
2. 市面上難以購買糧食，很難鼓勵市民捐贈呢啲咁難買到嘅嘢
3. 糧食價格大幅上升，有人買唔起食物，無可奈何向食物銀行求助，令食物銀行需求大增

呢次疫情，唔剩止考驗大家嘅衛生、健康意識，仲考驗大家嘅同理心!

資料: BBC