澳洲東南部新南威爾斯州，每年都有老鼠為患。呢啲老鼠，200年前坐渡輪由英國而來，至今落地生根。佢哋差唔多喺每年10月南半球春天開始繁殖，到3、4月秋收季節空群而出，令當地人甚為頭痛。
不過，今年嘅情況與過往有別，老鼠嘅繁殖達至世紀級大災難，有農民每日捉到7000隻老鼠。經濟損失暫時高達10億澳元 (約58億港幣)。
對於鼠患嚴重，當局暫時未有定論。有人話係天氣反常，改變老鼠習性，有人指澳洲政府失職，多年來都無解決鼠患問題。不過民眾為咗驅除老鼠，已經造成當地生態大災難。
----- 廣告 Ad -----
落重藥破壞生態
為咗盡快驅除老鼠，大多數人會用藥，當中最流行係一種叫 SGAR 嘅老鼠藥。SGAR 能夠快速殺死老鼠，但問題係佢難以喺大自然分解。
自鼠患爆發以來，有生態學者研究當地動物屍體，發現大部份身上都帶有 SGAR。
其中一種叫 Power Owl 嘅貓頭鷹，情況十分慘烈。有研究員呢幾個月收集到幾十隻 Power Owl 屍體，部份發現 SGAR。因為貓頭鷹以老鼠為主要獵物，所以估計同呢種老鼠藥有關。另外亦有研究員於塔斯馬尼亞楔尾鷹身上發現 SGAR，估計唔少蛇類亦同受 SGAR 所殺害。
令人更憂心嘅係，SGAR 難以於大自然快速分解。換句話講，SGAR 除咗會殘留喺老鼠屍體，亦有殘留喺植物及泥土，毒素好大機會進入食物鏈。
最近澳洲政府開始正視新南威爾斯嘅鼠患問題，希望當局可以諗到個兩全其美嘅方法。
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。