早幾日瀋陽公園「上吊」嘅盛況

遼寧瀋陽市一個公園有棵大樹,呢兩年來都圍滿大媽大叔集體「上吊」。呢班吊喺樹上嘅大媽大叔異口同聲話,佢哋咁做只係為咗強身健體,治療痛症。

話說大約於2019年,57歲嘅孫榮春,聲稱改良物理治療嘅「拉脖子」動作,自己裝設簡單裝備,喺瀋陽嘅公園「吊頸」,話可以治療肩頸痛等痛症。孫榮春玩下玩下,就吸引到一班人跟住佢,更吸引唔少傳媒追訪,其中包括國際通訊社路透社。

孫榮春2019接受路透社訪問所攝

呢兩年來,玩自吊嘅人越來越多,其中包括外國人,而瀋陽某公園一棵大樹,成為呢班信徒嘅集中地。成班人將自己掛臘鴨咁吊上大樹,仲做出唔同動作,離遠望真係似足一條條屍體,狀甚恐佈。

不過,呢班「信徒」個個都話,「上吊」有益身心,有病醫病無病強身,仲話而家人人玩手機,好易患有肩頸痛,所以呢個動作好啱時下城市人喎。

雖然都知道大家唔會跟住做,不過循例都提醒大家,有病痛就唔該睇醫生,唔好立亂試一啲無科學根據嘅治療方法。

資料: 聯合新聞網香港01


文章為作者意見,不代表Fitz立場。
歡迎投稿: http://fitz.hk/contribute/
首頁 > 生活 Life > 瀋陽公園大媽大叔集體「上吊」為強身健體