圖: 香港遺美 Hong Kong Reminiscence
12月28日上午,網上傳出「石峽尾主教山配水庫」消息,話水務署進行工程期間,發現一個古羅馬式歷史建築。不過,政府各個部門都冷淡對待,有警察甚至阻止前往觀賞歷史建築嘅市民,直到同日晚上,水務署終於回應傳媒,話已經停止上址工程,而古蹟辦亦已初步視察,將會繼續跟進。

不過,市民對於鬧市地底竟然有咁宏偉同特色嘅建築物,都表現得相當雀躍,短短十零個鐘,要字有字,要相有相,甚至有人拍埋片剪埋播埋出街。呢座逾百年歷史建築嘅資料,唔使等古蹟辦做研究,大家上網都可以略知一二。

筆者整理咗民間保育人士、區議員、環保團體,以及各方人士於網上分享嘅資料,試圖還原呢座地下水庫嘅故事。

配水庫有116年歷史

前立法會議員朱凱迪,轉載了 Chi Hau Thickest Choi 嘅發現。藉著 Thickest Choi 及網民嘅努力,援引多份歷史文件,還原地下水庫嘅建造、設計以及完工資料。

主教山配水庫位置,1913年九龍地圖。圖片來源: Chi Hau Thickest Choi (按圖放大)
Thickest Choi 引述 The Industrial History of Hong Kong Group 嘅一篇文章,發現「主教山水庫」係1890年代,殖民地政府改善九龍區供水系統其中一項工程。呢個大規範工程,希望可確保九龍區市民有足夠食水。

  • 「在長沙灣以北的山巒興建水塘 (即今日的九龍水塘群)、集水區、濾水床 (Filter Beds)、橋樑、隧道、喉管、員工宿舍等。九龍水塘的水經由450MM寬的主管道,輸送至主教山的配水庫,再由配水庫送水至油麻地抽水站,以分配食水至九龍市區 (今日窩打老道8號旁邊,尚保留當年的宿舍舊建築)。另亦設一條分支至荔枝角,提供食水予艇戶使用。」
  • 「主教山配水庫以明挖後填方式建成,基座以石屎建造,以花岡岩柱及磚拱作支撐。水庫呈圓形,直徑約47米、高6米,可儲水2,183,000加侖。」
  • 經留言網民查證,承辦工程是 “Denison, Ram & Gibbs”,1903年2月攞到合約,1903年尾起好一半,1904年8月完工。 (即係有116年歷史)
  • 承辦工程的 “Denison, Ram & Gibbs”,當中那位 Edward “Ram”,做過足球員,贏過英國足總杯
  • 依照1905年的《Report of the Director of Public Works, For The Year 1904》,主教山配水庫的工程在1904年8月10日竣工,較政府原訂的完工日期 (6月30日) 遲了兩個月。

另外,網上流傳一幅未搵到來源嘅水庫設計圖,顯示咗水庫嘅詳細結構。

圖: 網上圖片 按圖放大

深水埗區議員 何啟明 Ho Kai Ming Kalvin,親身到過地下配水庫,發現有水管刻有「1909」字樣,估計水管於1909年製造。

圖: 何啟明 Ho Kai Ming Kalvin

2017年區議會討論清拆配水庫

2017年9月,深水埗區議會地區設施委會嘅會議中,詳細討論過主教山配水庫嘅清拆工程。翻查會議記錄,水務署清楚表明,主教山配水庫係1930年代建築。唔知係咪因為唔夠一百年,唔算好耐嘅歷史,出席嘅區議員都無提及過要考證水庫嘅歷史,更加無人提過要保育。

與會區議員關注要點大致係:

  • 會唔會影響做晨運?
  • 會唔會破壞山上嘅有區議會徽號嘅設施?
  • 記住封住個地盤,以免有市民入到去發生意外
  • 水庫有幾大個? 拆咗之後會唔會起公園? 甚至起住宅?

主教山並唔係主教山

專欄作家葉一知 話佢屋企由上世紀50年代開始,已居於深水埗,但從未聽過主教山。佢話:「相對於深水埗一直聞名的嘉頓山,主教山連茄喱啡都不是。」

佢之後話:「其中一個較可信的說法,是圍着這座山有幾間教會學校圍着,包括聖方濟各英文小學、崇真小學暨崇真會堂、匯基書院、宣道小學以及香港宣教會恩磐堂,因而被匿稱為主教山。」

 

事實上,「主教山」應稱為「窩仔山」,而「窩仔街」途經大坑東、石峽尾。

市民拍片影相見證歷史

有市民搵資料嘅同時,亦有市民親到現拍片影相,目的都希望可以留住香港歷史。

保育團體 長春社 呼籲政府停止有關工程,並考慮將配水庫列為古蹟,進行保育工作。亦當區區議員 何啟明 Ho Kai Ming Kalvin ,亦發起網上聯署,要求政府將呢到列為暫定古蹟。

網上聯署 (民協): https://forms.gle/PtVVz5SLdE4zoViu9


文章為作者意見,不代表Fitz立場。
歡迎投稿: http://fitz.hk/contribute/
朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。