香港投考紀律部隊,就要接受體能測試,以應付訓練以及入職後日常職務。不過中國貴州茅台請員工都有體能要求,就有唔少人質疑做法。

貴州茅台日前公開招聘300多名員工,開宗明義要應徵人士先通過體能測試。體能測試要求應徵者跑步4分30秒: 男性至少要跑1000米,女性就至少要跑800米,達標先可以進行下一輪面試。廠方指佢哋請嘅係工廠生產線職位,而製作茅台酒嘅體力要求相當高。

茅台廠方解釋,製作「麯」呢種茅台原材料,牽涉相當繁複工序,佢哋為咗維持傳統製酒工藝,拒絕機械生產,所以工人需要強大體能。例如每一位製麯工人每日至少要行兩萬步,製酒工人就要每日抬100桶水,每桶水15公斤。

而對於跑步4分半鐘嘅體能要求,佢哋話並唔算苛刻,同大學三、四年級嘅要求一樣。

按圖放大

工廠請人有特殊要求,求職者唔鍾意大可唔申請。不過唔少人覺得,茅台呢次請人只係公司宣傳技倆,體能測試只係公關嚟喎。

資料: 搜狐


文章為作者意見,不代表Fitz立場。
歡迎投稿: http://fitz.hk/contribute/
首頁 > 生活 Life > 茅台廠請人體能測試: 男子4分半鐘跑1000米