[香港罕有] 一步都唔使行嘅營地

山雞師兄話，揸車去行山好麻煩 (見《[揸車去行山] 4大熱門郊野停車場》)，不過有人睇完篇文隨即問我，香港有無啲露營地點可以揸車去到。佢解釋話，佢屋企位公子仲未識得行，但係又想畀佢感受下戶外樂趣喎。我諗到一個，就係東華三院嘅馬草壟營地。

呢個營地最大特點，就係營友可以揸自己部私家車直達營地。負重行山？絕對唔使！

所謂直達營地，就真係直接到去到你紥營嘅地點。你只要泊好車，開車尾廂，拎個營幕出嚟，行兩步就可以紥營，真係完全可以唔使行。而萬一落大雨，或者天氣變壞，亦可以返自己部車暫避。

而營地嗰個大草地，就絕對啱晒一家大細進行戶外活動，踢下波、放紙鳶，甚至hea瞓喺草地望天都相當適宜。而管理處亦有枱椅、地蓆，甚至營幕、營燈等基本物資租借，帶漏嘢都唔怕。

不過，因為呢個營地係有嚴格管理，所以除咗禁煙禁酒之外，亦有唔少規則大家要留意。

 營地詳情

• 地點：粉嶺古洞馬草壟
• 管理：東華三院 (報名及查詢)
• 費用：每人營費 $120(童歲以下免費)；泊車費 $120。
• 主要營規：禁煙、禁酒、夜晚11點禁止喧嘩及大型活動、晚上10點禁止車輛出入、禁止攜帶寵物……
• 報名注意：該處不時被團體租用，計劃前往必先向營方查詢。

更多:
Fitz.hk Facebook專頁
崖上的PingTing，東龍洲做營人，真美!
[戶外煮食神器] 無煙無火淥個公仔面!
[情人節之選] 星光下的DIY晚餐
4大車船直達的營地
Fitz.hk Life生活